AVESTA: VISPERAD

 


Chapter 1.

(pa nãm i ýazdã)
(zôt,)
1
nivaêdhayemi hañkârayemi ratavô mainyavanãm ratavô gaêthyanãm ratavô upâpanãm ratavô upasmanãm ratavô frapterejâtãm ratavô ravascarâtãm ratavô cangranghâcãm ashaonãm ashahe rathwãm.
2
nivaêdhayemi hañkârayemi ýâiryaêibyô ashahe ratubyô, maidhyôizaremayehe payanghô ashaonô ashahe rathwô, nivaêdhayemi hañkârayemi maidhyôishemahe vâstrô-dâtainyehe ashaonô ashahe rathwô, nivaêdhayemi hañkârayemi paitishhahyehe hahyehe ashaonô ashahe rathwô, nivaêdhayemi hañkârayemi ayâthrimahe fraourvaêshtrimahe varshniharshtaheca ashaonô ashahe rathwô, nivaêdhayemi hañkârayemi maidhyâiryehe saredhahe ashaonô ashahe rathwô, nivaêdhayemi hañkârayemi hamaspathmaêdayehe aretô-karethnahe ashaonô ashahe rathwô.
3
nivaêdhayemi hañkârayemi gaêthanãm ånghairyehe ashaonô ashahe rathwô ýat ånghairyô zîzanen, nivaêdhayemi hañkârayemi staotanãm ýesnyanãm hañdâtanãm hufrâyashtanãm ashaonô ashahe rathwô, nivaêdhayemi hañkârayemi staotanãm ýesnyanãm hañdâtanãm hufrâyashtanãm ashaonãm ashaoninãmca ashahe myazdanãm.
4
nivaêdhayemi hañkârayemi saredhaêibyô ashahe ratubyô ahunahe vairyehe frasraothrahe ashaonô ashahe rathwô, nivaêdhayemi hañkârayemi ashahe vahishtahe staothwahe ashaonô ashahe rathwô, nivaêdhayemi hañkârayemi ýenghê- hâtayå hufrâyashtayå ashaonyå ashahe rathwô.
5
nivaêdhayemi hañkârayemi ahunavaityå gâthayå ashaonyå ashahe rathwô,
nivaêdhayemi hañkârayemi khenãnãm pouru-saredhô-vîrô-vãthwanãm mazdadhâtanãm ashaonãm ashahe rathwãm, nivaêdhayemi hañkârayemi ahumatô ratumatô ashaonô ashahe rathwô, nivaêdhayemi hañkârayemi ýasnahe haptanghâtôish ashaonô ashahe rathwô, nivaêdhayemi hañkârayemi areduyå âpô anâhitayå ashaonyå ashahe rathwô.
6
nivaêdhayemi hañkârayemi ushtavaityå gâthayå ashaonyå ashahe rathwô, nivaêdhayemi hañkârayemi gairinãm ashahvâthranãm pouru-hvâthranãm mazdadhâtanãm ashaonãm ashahe rathwãm, nivaêdhayemi hañkârayemi speñtâ-manyêush gâthayå ashaonyå ashahe rathwô, nivaêdhayemi hañkârayemi verethrakhnahe ahuradhâtahe vanaiñtyåsca uparatâtô ashaonô ashahe rathwô.
7
nivaêdhayemi hañkârayemi vohuxshathrayå gâthayå ashaonyå ashahe rathwô, nivaêdhayemi hañkârayemi mithrahe vouru-gaoyaotôish râmanasca hvâstrahe ashaonô ashahe rathwô, nivaêdhayemi hañkârayemi vahishtôishtôish gâthayå ashaonyå ashahe rathwô, nivaêdhayemi hañkârayemi dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe ashaonô ashahe rathwô.
8
nivaêdhayemi hañkârayemi airyamanô ishyehe ashaonô ashahe rathwô, nivaêdhayemi hañkârayemi fshûshô-mãthrahe ashaonô ashahe rathwô, nivaêdhayemi hañkârayemi ratêush berezô hadhaoxtahe ashaonô ashahe rathwô.
9
nivaêdhayemi hañkârayemi âhurôish frashnahe âhurôish tkaêshahe âhurôish dâh’yumahe âhurôish zarathushtrôtemahe ashaonô ashahe rathwô, nivaêdhayemi hañkârayemi hadishaheca vâstravatô vâstrô-beretaheca gave hudhånghe gaoidyeheca narsh ashaonô!!

Chapter 2.

1
ahmya zaothre baresmanaêca ratavô mainyava âyese ýeshti, ratavô gaêthya âyese ýeshti, ratavô upâpa âyese ýeshti, ratavô upasma âyese ýeshti, ratavô frapterejâta âyese ýeshti, ratavô ravascarâta âyese ýeshti, ratavô cangranghâca âyese ýeshti.
2
ahmya zaothre baresmanaêca ýâirya ashavana ashahe ratavô âyese ýeshti,
maidhyôizaremaêm payanghem ashavanem ashahe ratûm âyese ýeshti, ahmya zaothre baresmanaêca maidhyôishemem vâstrô-dâtainîm ashavanem ashahe ratûm âyese ýeshti, ahmya zaothre baresmanaêca paitishhahîm hahîm ashavanem ashahe ratûm âyese ýeshti, ahmya zaothre baresmanaêca ayâthrimem fraourvaêshtrimem varshniharshtem ashavanem ashahe ratûm âyese ýeshti, ahmya zaothre baresmanaêca maidhyâirîm saredhem ashavanem ashahe ratûm âyese ýeshti, ahmya zaothre baresmanaêca hamaspathmaêdaêm aretô- karethnem ashavanem ashahe ratûm âyese ýeshti.
3
ahmya zaothre baresmanaêca gaêthanãm ånghairîm ashavanem ashahe ratûm âyese ýeshti ýat ånghairyô zîzanen, ahmya zaothre baresmanaêca vîspe tê ratavô âyese ýeshti ýôi aoxta ahurô mazdå zarathushtrâi ýasnyâca vahmyâca ashât haca ýat vahishtât.
4
ahmya zaothre baresmanaêca thwãm ratûm âyese ýeshti ýim ahurem mazdãm mainyaom mainyavanãm dâmanãm mainyaoyå stôish ahûmca ratûmca,
ahmya zaothre baresmanaêca thwãm ratûm âyese ýeshti ýim zarathushtrem spitâmem gaêthîm gaêthyanãm dâmanãm gaêthyayå stôish ahûmca ratûmca.
5
ahmya zaothre baresmanaêca rathwãm framaretârem âyese ýeshti ýim narem ashavanem dadhrânem humatemca manô hûxtemca vacô hvarshtemca shyaothnem, speñtãm ârmaitîm daretem ýôi mãthrem saoshyañtô ýenghe shyaothnâish gaêthå asha frâdeñte.
6
ahmya zaothre baresmanaêca saredha ashavana ashahe ratavô âyese ýeshti, ahunem vairîm frasraothrem ashavanem ashahe ratûm âyese ýeshti, ahmya zaothre baresmanaêca ashem vahishtem staothwem ashavanem ashahe ratûm âyese ýeshti, ahmya zaothre baresmanaêca ýenghê-hâtãm hufrâyashtãm ashaonîm ashahe ratûm âyese ýeshti.
7
ahmya zaothre baresmanaêca ahunavaitîm gâthãm ashaonîm ashahe ratûm âyese ýeshti, khenå hubakhå hufedhrîsh huraodhanghô âyese ýeshti, ahmya zaothre baresmanaêca ahumeñtem ratumeñtem ashavanem ashahe ratûm âyese ýeshti, hô-zî asti ahûmca ratûmca ýô ahurô mazdå, ahmya zaothre baresmanaêca ýasnem sûrem haptanghâitîm ashavanem ashahe ratûm âyese ýeshti, aredvîm sûrãm anâhitãm ashaonîm ashahe ratûm âyese ýeshti.
8
ahmya zaothre baresmanaêca ushtavaitîm gâthãm ashaonîm ashahe ratûm âyese ýeshti. garayô ashahvâthrå pouru-hvâthrå mazdadhâta ashavana ashahe ratavô âyese ýeshti, ahmya zaothre baresmanaêca speñtâ-mainyûm gâthãm ashaonîm ashahe ratûm âyese ýeshti. verethrakhnem ahuradhâtem âyese ýeshti, vanaiñtîmca uparatâtem âyese ýeshti.
9
ahmya zaothre baresmanaêca vohuxshathrãm gâthãm ashaonîm ashahe ratûm âyese ýeshti. mithrem vouru-gaoyaoitîm âyese ýeshti, râma hvâstrem âyese ýeshti, ahmya zaothre baresmanaêca vahishtôishtîm gâthãm ashaonîm ashahe ratûm âyese ýeshti. dahmãm vanguhîm âfritîm âyese ýeshti, dahmemca narem ashavanem âyese ýeshti, ukhrem taxmem dâmôish upamanem ýazatem âyese ýeshti.
10
ahmya zaothre baresmanaêca airyamanem ishîm ashavanem ashahe ratûm âyese ýeshti. ahmya zaothre baresmanaêca fshûshô-mãthrem ashavanem ashahe ratûm âyese ýeshti. ahmya zaothre baresmanaêca ratûm berezem hadhaoxtem ashavanem ashahe ratûm âyese ýeshti.
11
ahmya zaothre baresmanaêca âhûirîm frashnem ashavanem ashahe ratûm âyese ýeshti. âhûirîm tkaêshem ashavanem ashahe ratûm âyese ýeshti. ahmya zaothre baresmanaêca hadish vâstravatô âyese ýeshti, vâstrem beretem gave hudhånghe âyese ýeshti, gaodâyûm narem ashavanem âyese ýeshti!!

Chapter 3.

1
(zôt,) hâvanânem âstâya, (râspî,) azem vîsâi, (zôt,) âtravaxshem âstâya, (râspî,) azem vîsâi, (zôt,) fraberetârem âstâya, (râspî,) azem vîsâi, (zôt,) âberetem âstâya, (râspî,) azem vîsâi, (zôt,) âsnatârem âstâya, (râspî,) azem vîsâi, (zôt,) raêthwishkarem âstâya, (râspî,) azem vîsâi, (zôt,) sraoshâvarezem âstâya dãhishtem arshvacastemem, (râspî,) azem vîsâi. ýathâ ahû vairyô ýô zaotâ frâ-mê mrûtê (zôt,) athâ ratush … mraotû.
2
(zôt u râspî,) âthravanem âstâya, rathaêshtârem âstâya, vâstrîm fshuyañtem âstâya, nmânahe nmânô-paitîm âstâya, vîsô vîspaitîm âstâya, zañtêush zañtupaitîm âstâya, dainghêush dainghupaitîm âstâya.
3
ývânem humananghem hvacanghem hushyaothnem hudaênem âstâya. ývânem uxdhô-vacanghem âstâya, hvaêtvadathem âstâya, dainghâurvaêsem âstâya, humâim pairijathnem âstâya, nmânahe nmânô-pathnîm âstâya.
4
nâirikãmca âstâya frâyô- humatãm frâyô-hûxtãm frâyô- hvarshtãm hush-hãm-sâstãm ratuxshathrãm ashaonîm ýãm ârmaitîm speñtãm ýåsca tê khenå ahura mazda, naremca ashavanem âstâya frâyô-humatem frâyô-hûxtem frâyô-hvarshtem vistô-fraoreitîm evistô-kayadhem ýenghe shyaothnâish gaêthå asha frâdeñte.
5
âat vô kascit mazdayasnanãm ratûsh âmrûmaide ratûsh âstâyamaide ameshêsca speñtê saoshyañtasca dãhishtê arshvacastemã aiwyâmatemã ashxrâhvanutemã, mazishtê amã âmrûmaide daênayå mâzdayasnôish athaurunãsca rathaêshtârêsca vâstryãsca fshuyañtô!
6
(zôt,) ýathâ ahû vairyô ýô âtravaxshô frâ-mê mrûtê, (râspî,) athâ ratush … mraotû, ýathâ ahû vairyô ýô zaotâ frâ-mê mrûtê, (zôt,) athâ ratush … mraotû.
7
(râspî,) tûm nô âthraom zaotastê. (zôt,) ýathâ ahû vairyô ýô âtravaxshô frâ-mê mrûtê, (râspî,) athâ ratush … mraotû. (zôt,) azem aêta zaota vîsâi staotanãm ýesnyanãm frasraothremca framarethremca fragâthremca frâyashtîmca!!

Chapter 4.

1
âca manô mata âca ýazamaide vanguhîmca âdãm vanguhîmca ashîm vanguhîmca cistîm vanguhîmca drvatâtem avi ratûsh avi rathwya gereñte.
2
frâ gave vereñdyâi mazdayasna zarathushtrayô â-hîm vaêdhayamahî rathwaêca myazdaêca rathwaêca ratufritayaêca vîspayå sãcatca ashaonô stôish ýasnâica vahmâica xshnaothrâica frasastayaêca sraoshô astu, sraoshem ashîm … tåscâ ýazamaide!!

Chapter 5.

1
vîse vô amesha speñta staota zaota zbâta ýashta framareta aibijareta ýûshmâkem ýasnâica vahmâica xshnaothrâica frasastayaêca ýat ameshanãm speñtanãm ahmâkem havanghâica ratufritayaêca ashavastâica verethrakhnyâica hurunyâica ýat saoshyañtãm ashaonãm.
2
pairî-vê ameshâ speñtâ huxshathrâ hudhånghô dadhãmi tanvascît hvah’yå ushtanem pairî vîspå hujîtayô.
3
frâ-tê verene ahe daênaya ashâum ahura mazda mazdayasnô zarathushtrish vîdaêvô … mraotû!!

Chapter 6.

1
(zôt u râspî,) sastica (zôt,) vañtâca rafnanghâca vîthushaêibyasca zaothrâbyô arshuxdhaêibyasca vâkhzhibyô ameshê speñtê vanghûsh srîrâish nâmãn âzbaya, ameshê speñtê vanghûsh srîrâish nâmãn ashahe frâyeze bereja vanghêush ashahe bereja daênayå vanghuyå mâzdayasnôish, ýenghê mê ashât hacâ … ýê-nå ishtô!!

Chapter 7.

1
vaca arshuxdha ýazamaide, sraoshem ashîm ýazamaide, ashîm vanguhîm ýazamaide, nairîm sanghem ýazamaide, âxshtîm hãm-vaiñtîm ýazamaide, asteretaca amuyamna ýazamaide, ashâunãmca fravashayô ýazamaide, cinvatô peretûm ýazamaide, garô nmânem ahurahe mazdå ýazamaide, vahishtem ahûm ashaonãm ýazamaide raocanghem vîspô-hvâthrem. (… vaca arshuxdha … vîspô-hvâthrem(3).)
2
vahishtahe anghêush vahishtãm ayanãm ýazamaide, arshtâtem ýazamaide vanguhîm frâdat- gaêthãm varedat-gaêthãm savô-gaêthãm ýãm daênãm mâzdayasnîm, rashnûm razishtem ýazamaide, mithrem vouru-gaoyaoitîm ýazamaide, revîm pareñdîm ýazamaide revîm ravô-mananghãm revîm ravô-vacanghãm revîm ravô-shyaothenanãm
frâ tanvô reñjayeiti.
3
nairyãm hãm-vareitîm ýazamaide framen-narãm
framen-narô-vîrãm ýâ âsaot âsyå ýâ taxmô-tãshyå ýâ dim jasaiti bakhô-baxtemcit
ýâ narãm vîgereptâcit
tanvô baoxtârem dadhâiti, hvafnem mazdadhâtem ýazamaide shâitîm pasvå vîrayå.
4
avå dâmãn ashavanô ýazamaide ýå heñti paoiryô-dâta paoiryô-frathwarshta ashnâatca apâatca zemâatca urvarayâatca gaotca hudhånghat, zrayô vourukashem ýazamaide, vâtem darshîm mazdadhâtem ýazamaide, asmanem hvanvañtem ýazamaide paoiryô-dâtem paoiryô-frathwarshtem gaêthîm gaêthyayå stôish.
5
thwãm âtrem ahurahe mazdå puthrem ashavanem ashahe ratûm ýazamaide, hadha-zaothrem hadha-aiwyånghanem imat baresma ashaya frastaretem ashavanem ashahe ratûm ýazamaide, apãm naptârem ýazamaide, nairîm sanghem … tåscâ ýazamaide. (râspî,) ýathâ ahû vairyô ýô zaotâ frâ-mê mrûtê, (zôt,) athâ ratush … mraotû!!

Chapter 8.

(râspî,)
1
aêta vaca madhayangha
ahe vaca señdayangha
ahurô mazdå ashava hathra vanghubyô ýazataêibyô ýat ameshaêibyô speñtaêibyô huxshathraêibyô hudhâbyô pañcasatbîshca satâishca hazangrâishca baêvarebîshca ahãxshtâishca frâyebîshcatca ahmât.
2
huxshathrôtemâi bât xshathrem ahmat hyat aibî dademahicâ … ashâicâ vahishtâi. (…huxshathrôtemâi … vahishtâi(3)!!)

Chapter 9.

1
haomanãm uzdâtanãm zaothranãm uzdâtanãm uzdâtanãm uzdâhyamnanãm vârethrakhninãm paiti-bishinãm ashôish baêshaza hacimnanãm cistôish baêshaza hacimnanãm mazdå baêshaza hacimnanãm zarathushtrahe baêshaza hacimnanãm zarathushtrôtemahe baêshaza hacimnanãm
2
ava baêshaza hacimnanãm ýâ humâyehe ashaonô ýâ humâyehe pairijathnô ýâ daênayå vanghuyå mâzdayasnôish ýâ dahmayå vanghuyå
âfritôish ýâ dahmayå vanghuyå anâdruxtôish ýâ dahmayå vanghuyå anavauruxtôish
3
âvistayaêca aiwi-vistayaêca aiwish-hutayaêca upâshtayaêca upangharshtayaêca hufrâyashtayaêca huframeretayaêca ýôi heñti haoma sûra speñta ashavana ashaya uzdâta ashaya uzdâhyamna ashaya aiwi-vaêdhayamna ashaya aiwi-vaêdhayañta ashaya hunvana ashaya haoshyañta
4
amavatô amâi amavatô verethrakhnâi amavaithyå erethyå amavaithyå ashôish amavaithyå cistôish amavaithyå paurvatâtô amavaithyå uparatâtô amavatbyô aêibyô ýazataêibyô ýat ameshaêibyô speñtaêibyô huxshathraêibyô hudhâbyô ýavaêjibyô ýavaêsubyô ýôi vanghêush â-mananghô shyeiñti ýåsca uiti,
5
haurvatåsca nô ameretâtå gêushca tashnô gêushca urunô âthrasca aoxtô-nâmanô hadishasca ashivatô vâstravatô hvâthravatô marzhdikavatô
6
staotaca ýasnâica vahmâica frasastayaêca ýat aêsha ahurahe mazdå ýat aêsha ameshanãm speñtanãm ratêushca ashaonô berezatô ýasnâica vahmâica ýat apanôtemahe rathwô ýat jakhmûshyå ashôish ýat jakhmûshyå ratufritôish
7
ýat mãthrahe speñtahe ýat daênayå mâzdayasnôish ýat staotanãm ýesnyanãm ýat vîspaêshãmca rathwãm vîspanãmca ratufritinãm vîspayå sãcatca ashaonô stôish ýasnâica vahmâica xshnaothrâica frasastayaêca sraoshô astû hyat paourvîm tat ustememcît, (zôt,) ýathâ ahû vairyô ýô âtravaxshô … tåscâ ýazamaide!!

Chapter 10.

1
(zôt,) âyese ýeshti arezahibyô savahibyô fradadhafshubyô vîdadhafshubyô vouru-bareshtibyô vouru-jareshtibyô aheca karshvanê ýat hvanirathahe.
2
âyese ýeshti asmanaêibya hâvanaêibya ayanghaênaêibya hâvanaêibya tashtâi zaothrô-barenâi varesâi haomô-angharezânâi tavaca baresmanô ashaya frastaretahe, âyese ýeshti ahunahe vairyehe anahunâca ratushca stitâtasca daênayå mâzdayasnôish, âyese ýeshti ashâunãm fravashinãm > mraotû!!

Chapter 11.

1
ahurâi mazdâi haomã âvaêdhayamahî ýat uzdâtem sevishtem verethrakhne frâdat-gaêthâi ýat huxshathrâi ashaone ýat ratuxshathrâi ashaone, ameshaêibyô speñtaêibyô haomã âvaêdhayamahî, aiwyô vanguhibyô haomã âvaêdhayamahî, havahe urunô haomã âvaêdhayamahî, vîspayå ashaonô stôish haomã âvaêdhayamahî.
2
imã haomã ima haomya ima stareta ima myazda ima asma paoirya dâmãn ima asmana hâvana avi-bereta haoma zâire ima ayanghaêna hâvana avi-bereta haoma zâire imãm âpem haomyãm imat baresma ashaya frastaretem
3
imå kehrpasca tevîshîshca imå ýaêtushîsh zaothrå imem haomem ashavanem gãmca hudhånghem naremca ashavanem âsnaca manå ashaonãm âsnaca manå saoshyañtãm imãmcâ gãm jîvyãm ashaya uzdâtãm imãmcâ urvarãm hadhânaêpatãm ashaya uzdâtãm,
4
aiwyô vanguhibyô imå zaothrå haomavaitîsh gaomavaitîsh hadhânaêpatavaitîsh ashaya uzdâtå aiwyô vanguhibyô apemca haomyãm asmanaca hâvana ayanghaênaca hâvana,
5
imãmcâ urvarãm baresmanîm jakhmûshîmca ratufritîm marethremca varezîmca daênayå vanghuyå mâzdayasnôish gâthanãmca sraothrem jakhmûshîmca ashaonô ashahe rathwô ratufritîm imã aêsmãsca baoidhîmca tava âthrô ahurahe mazdå puthra vîspaca vohu mazdadhâta ashacithra pairica dademahî âca vaêdhayamahî âat dîsh âvaêdhayamahî,
6
ahurâica mazdâi sraoshâica ashyâi rashnvaêca razishtâi mithrâica vouru-gaoyaotêe ameshaêibyasca speñtaêibyô ashâunãmca fravashibyô ashâunãmca urvôibyô âthraêca ahurahe mazdå rathwaêca berezaite rathwaêca myazdaêca rathwaêca ratufritayaêca vîspayå sãcatca ashaonô stôish ýasnâica vahmâica xshnaothrâica frasastayaêca.
7
âat dîsh âvaêdhayamahî zarathushtrahe spitâmahe ashaonô fravashêe ýasnâica vahmâica xshnaothrâica frasastayaêca anghuyaosh ashacinanghô mat vîspâbyô ashaonibyô fravashibyô ýå irîrithushãm ashaonãm ýåsca jvañtãm ashaonãm ýåsca narãm azâtanãm frashô-carethrãm saoshyañtãm!
8-11
imã haomã … ashacithra pairica dademahî âca vaêdhayamahî âat dîsh âvaêdhayamahî,
12
ameshaêibyô speñtaêibyô huxshathraêibyô hudhâbyô ýavaêjibyô ýavaêsubyô ýôi vohu ýôi vohunãm dâtârô ýôi vanghêush â-mananghô shyeiñti, vanghêush â-zî â-mananghô shyeiñti ýôi ameshå speñta huxshathra hudhånghô adhât mâta adhât bûta haca vanghaot mananghat.
13
âat dîsh âvaêdhayamahî frâyehîsh ahe nmânahe fradathâi ahe nmânahe savanghô ahe nmânahe vaxshat ahe nmânahe vîtarãzô ahe nmânahe vîtare-tbaêshô ahe nmânahe pasvãmca narãmca zâtanãmca zãhyamnanãmca ashaonãm ýenghe aêm anghen ýenghe aêm heñti ýenghe vaêm mahi ýôi saoshyañtô dah’yunãm
14
ýat vohvarezãm ashaonãm ýat vohvarezinãm ashaoninãm ýat haithyâvarezãm ashaonãm ýat haithyâvarezinãm ashaoninãm ýat hvarshtâvarezãm ashaonãm ýat hvarshtâvarezinãm ashaoninãm.
15
âat dîsh âvaêdhayamahî ashâunãm vanguhibyô fravashibyô ýå ukhråsca aiwithûråsca ashaonãm avanghe.
16
âat dîsh âvaêdhayamahî sraoshahe ashyehe ashôishca vanghuyå nairyeheca sanghahe âxshtibyâca hãm-vaiñtibya âthraêca ahurahe mazdå rathwaêca berezaite vîspayå sãcatca ashaonô stôish ýasnâica vahmâica xshnaothrâica frasastayaêca, âat dîsh âvaêdhayamahî ahurâi mazdâi vanghave mananghe … ýôi heñti ashahe ratavô hâvanôish rathwô ýasnâica vahmâica xshnaothrâica frasastayaêca, âat dîsh âvaêdhayamahî ahurahe mazdå raêvatô hvarenanguhatô xshnaothra ýasnâica vahmâica xshnaothrâica frasastayaêca.
17-18
âat dîsh âvaêdhayamahî arezahibyô … stitâtasca daênayå mâzdayasnôish!
19
ýat uzdâtem ýat âvistem ýatha dîsh âvaêdhayat ahurô mazdå ashava ýatha dîsh âvaêdhayat ýô ashava zarathushtrô ýatha dîsh azem ýô zaota âvaêdhayemi vîdhvå aêshãm ýasnemca vahmemca vîdhvå dâityãm âvistîm vîdhvå rathwyãm âvistîm
20
ýûshmâkem ýasnâica vahmâica xshnaothrâica frasastayaêca ýat ameshanãm speñtanãm ahmâkem havanghâica ratufritayaêca ashavastâica verethrakhnyâica hurunyâica ýat saoshyañtãm ashaonãm.
21
âat idha dim vîspanãm mazishtem dademahi ahûmca ratûmca ýim ahurem mazdãm ýasnâica vahmâica xshnaothrâica frasastayaêca, âat dîsh âvaêdhayamahî ashâunãm fravashinãm … ashât haca ýat vahishtât!!

Chapter 12.

1
haomanãmca hareshyamnanãm ýôi hareshyeñte rathwe berezaite ýat ahurâi mazdâi ashaone ýat zarathushtrâi spitamâi frafshu frâvîra tâca hâ vanghush sraoshô ashyô ýô ashahe hacaite mãzaraya hêca idha ýôithwâ astu.
2
humaya upanghå cîshmaide ahunahe vairyehe ashaya frasrûtahe frasrâvayamnahe hâvanayåsca haomã hunvaiñtyå ashaya frashûtayå frashâvayamnayå
3
arshuxdhanãmca vacanghãm sravanghãmca zarathushtrinãm hvarshtanãmca shyaothnanãm baresmanãmca ashaya frastaretanãm haomanãmca ashaya hutanãm staotanãmca ýesnyanãm daênayåsca mâzdayasnôish mãthwanãmca vaxedhwanãmca varshtvanãmca.
4
atha-zî-nê humâyôtara anghen, humaya aêta dâmãn dademaide humaya cîshmaide humaya mainyâmaide ýã dathat ahurô mazdå ashava thraoshta vohu manangha vaxsht asha ýâ hâtãm mazishtaca vahishtaca sraêshtaca, atha-zî-nê humâyôtaraca îzhyôtaraca ånghâma ýâish speñtahe mainyêush dâmãn ýat hîsh humayaca îzhyâca cinathâmaide.
5
humaya-nô buyata asmana hâvana ayanghaêna hâvana fraoirisimna frashâvayamna nmânayaca vîsyaca zañtavaca dainghavaca ahmi nmâne ainghe vîsi ahmi zañtvô ainghe dainghô ahmâkemca mazdayasnanãm frâyazemnanãm hadha-aêsmanãm hadha-baoidhinãm hadha-ratufritinãm, atha-zî-nê humâyôtara anghen. (râspî,) ýathâ ahû vairyô ýô zaotâ … mraotû. ýathâ ahû vairyô…(4). ashem vohû…!!

Chapter 13.

(zôt,)
0
ahurem mazdãm ashavanem ashahe ratûm ýazamaide, zarathushtrem ashavanem ashahe ratûm ýazamaide, zarathushtrahe ashaonô fravashîm ýazamaide, ameshê speñtê ashaonãm ýazamaide, ashâunãm vanguhîsh sûrå speñtå fravashayô ýazamaide astvatô manahyâca, apanôtemem rathwãm ýazamaide ýaêtushtemem ýazatanãm hanghanushtemem ashahe rathwãm aiwinasãstemem jakhmûshtemãm ashaonô ashahe rathwô ratufritîm ýazamaide!
1
ashem ahurem mazdãm ýazamaide, ashem ameshê speñtê ýazamaide, ashem arshuxdhem ýazamaide, ashem vîspem mãthrem ýazamaide, zarathushtrem hadha-mãthrem ýazamaide, sava ashavabyô ýazamaide ushta ameshaêibyô speñtaêibyô ýazamaide, tishrô paoiryô ýazamaide anapyûxdhô anapishûtô.
2
ashem ahurem mazdãm ýazamaide … anapishûtô, tishra paoirya ýazamaide anapyûxdha anapishûta.
3
ashem ahurem mazdãm … tishrô paoiryô ýazamaide anapyûxdhô anapishûtô, tishra paoirya ýazamaide anapyûxdha anapishûta. tishra haurva-paoirya ýazamaide anapyûxdha anapishûta, tishranãm haurva-paoiryanãm ýazamaide anapyûxdhanãm anapishûtanãm hâitishca afsmanâca vacasca vacastashtîmca frasraothremca framarethremca fragâthremca frâyashtîmca, thwãm âtrem ahurahe mazdå puthrem … tåscâ ýazamaide!!

Chapter 14.

0
ahurem mazdãm … ratufritîm ýazamaide, ahunavaitîm gâthãm ashaonîm ashahe ratûm ýazamaide
1
mat-afsmanãm mat-vacastashtîm mat-âzaiñtîm mat-peresvîm mat-paiti-peresvîm mat vakhzhibyâca patbyasca huframeretãm framaremnãm hufrâyashtãm frâyaêzyañtãm
2
hvahmi dãm hvahmi cithre hvahmi zaoshe hvahmi xshathre hvahmi ratavô hvahmi âyaptem ýat ahurahe mazdå fraoret fraxshne avi manô zrazdâtôit anghuyat haca.
3
ahunem vairîm ashavanem ashahe ratûm ýazamaide, ahumeñtem ratumeñtem ashavanem ashahe ratûm ýazamaide, hô-zî asti ahûmca ratûmca ýô ahurô mazdå(4).
4
ahunavaityå gâthayå hañdâtâ ýazamaide, ahunavaityå gâthayå ýazamaide hâitishca afsmanâca vacasca vacastashtîmca frasraothremca framarethremca fragâthremca frâyashtîmca, thwãm âtrem … tåscâ ýazamaide. ashem vohû…(3). ýenghê mê … ýê nå ishtô!!

Chapter 15.

1
(râspî,) ava padhô ava zastê
ava ushi dârayadhwem mazdayasna zarathushtrayô dâityanãm rathwyanãm hvarshtanãm shyaothnanãm varezâi pairi adhâityanãm arathwyanãm duzhvarshtanãm shyaothnanãm varezâi verezyâtãmca idha vohu vâstrya uyamna anuyamnâish daste.
2
sraoshasca idhâ astû ahurahe mazdå ýasnâi sevîshtahe ashaonô ýê nå ishtô ýasnaheca haptanghâtôish fravâkaêca paityâstayaêca mazdâtayaêca zarazdâtayaêca frameretayaêca fraoxtayaêca verethrakhne ashaone anapyûxdhe anapishûte,
3
ýô fravaoce ýô fravaxshyeite maza amava verethraja vîdvaêshtvô, vacãmca vârethrakhninãm fravâkâi âthrasca ahurahe mazdå.
4-5
staotaca ýasnâica vahmâica frasastayaêca ýat aêsha ahurahe mazdå … ustememcît. (zôt,) ýathâ ahû vairyô ýô âtravaxshô … ýê nå ishtô. ava padhô ava zastê … sraoshô astû, sraoshem ashîm ýazamaide ratûm … tåscâ ýazamaide!!

Chapter 16.

0
ahurem mazdãm ashavanem ashahe ratûm … ratufritîm ýazamaide, ýasnem sûrem haptanghâitîm ashavanem ashahe ratûm ýazamaide mat-afsmanem mat-vacastashtîm mat-âzaiñtîm mat-peresûm mat-paiti-peresûm mat vakhzhibyâca patbyasca huframeretem framaremnem hufrâyashtem frâyaêzyañtem hvahmi dãm hvahmi cithre > fraxshne avi manô zrazdâtôit anghuyat haca!
1
âtremca idha ahurahe mazdå puthrem ýazamaide, âtarsh-cithrêsca ýazatê ýazamaide, âtarsh-cithrêsca rashnushca ýazamaide, ashâunãmca fravashayô ýazamaide, sraoshemca ýim verethrâjanem ýazamaide, naremca ýim ashavanem ýazamaide, vîspãmca ýãm ashaonô stîm ýazamaide.
2
zarathushtrahe spitâmahe idha ashaonô ashîmca fravashîmca ýazamaide, vîspaêca idha ashaonô ashîmca fravashîmca ýazamaide, vîspå fravashayô ashâunãm ýazamaide, âdah’yunãmca ashaonãm fravashayô ýazamaide, uzdâh’yunãmca ashaonãm fravashayô ýazamaide, narãmca ashaonãm fravashayô ýazamaide, nâirinãmca ashaoninãm fravashayô ýazamaide.
3
ýaêshãm nô ahurô mazdå ashava ýesne paiti vanghô vaêdha aêshãm zarathushtrô anghuca ratushca, shôithrya apasca zemasca urvaråsca ýazamaide. (…âtremca idha ahurahe … urvaråsca ýazamaide(2).)
4
ýasnahe haptanghâtôish hañdâtâ ýazamaide, ýasnahe haptanghâtôish ýazamaide hâitishca afsmanâca vacasca vacastashtîmca … tåscâ ýazamaide!!

Chapter 17.

1
ashem vohû…(3). aiwi-geredhmahi ýasnahe haptanghâtôish humataca hûxtaca hvarshtaca, aiwi-geredhmahi ashem vohû…. (…aiwi-geredhmahi … ashem vohû…(3)!!)

Chapter 18.

0
ahurem mazdãm ashavanem ashahe ratûm … ratufritîm ýazamaide, ushtavaitîm gâthãm ashaonîm ashahe ratûm ýazamaide mat-afsmanãm mat-vacastashtîm mat-âzaiñtîm mat-peresvîm mat-paiti-peresvîm mat vakhzhibyâca patbyasca huframeretãm framaremnãm hufrâyashtãm frâyaêzyañtãm hvahmi dãm … fraxshne avi manô zrazdâtôit anghuyat haca,
ahunem vairîm ashavanem ashahe ratûm ýazamaide ahumeñtem … ahurô mazdå (4)!
1
ushta ahurem mazdãm ýazamaide, ushta ameshê speñtê ýazamaide, ushta narem ashavanem ýazamaide, ushta paoiryãm ashaonô stîm ýazamaide, ushtatâtemca naire ashaone ýazamaide.
2
vîspâyûmca ushtatâtem ýazamaide ýâ narsh sâdra drvatô, ushtatâtem akaranem ýazamaide, ushtatâityaca vîspem ashavanem heñtemca bavañtemca bûshyañtemca ýazamaide. (…ushta ahurem … bûshyañtemca ýazamaide(2).)
3
ushtavaityå gâthayå hañdâtâ ýazamaide, ushtavaityå gâthayå ýazamaide hâitishca afsmanâca … tåscâ ýazamaide!!

Chapter 19.

0
ahurem mazdãm ashavanem ashahe ratûm … ratufritîm ýazamaide, speñtâ-mainyûm gâthãm ashaonîm ashahe ratûm ýazamaide mat-afsmanãm mat-vacastashtîm mat-âzaiñtîm mat-peresvîm mat-paiti-peresvîm mat vakhzhibyâca patbyasca huframeretãm framaremnãm hufrâyashtãm frâyaêzyañtãm hvahmi dãm … fraxshne avi manô zrazdâtôit anghuyat haca!
1
speñtem ahurem mazdãm ýazamaide, speñtem ameshê speñtê ýazamaide, speñtem narem ashavanem ýazamaide, speñtem paras-xrathwem ýazamaide, speñtãm vanguhîm ârmaitîm ýazamaide, speñtô-dâtâish dâmãn ashavanô ýazamaide, dâmãn manas-paoirya ashavanô ýazamaide, xratûm vîspô-vîdhvånghem ýazamaide ýim ahurem mazdãm.
2
hvare raocô ýazamaide, hvare barezishtem barezimanãm ýazamaide, hvareca ameshê speñtê ýazamaide, hvarshtå mãthrå ýazamaide, hvanvaitîsh verezô ýazamaide, âtat hvarenô ýazamaide, âtaredâta vãthwa ýazamaide, ashava frathasvô ýazamaide, dâmîm ýazamaide ýãm ârmaitîm speñtãm ýehe dâthre ashaheca ashaonãmca asha-paoiryanãm dâmanãm. (speñtem ahurem … dâmanãm(2).)
3
speñtâ-mainyêush gâthayå hañdâtâ ýazamaide, speñtâ-mainyêush gâthayå ýazamaide hâitishca afsmanâca … tåscâ ýazamaide!!

Chapter 20.

0
ahurem mazdãm ashavanem ashahe ratûm … ratufritîm ýazamaide, vohuxshathrãm gâthãm ashaonîm ashahe ratûm ýazamaide mat-afsmanãm mat-vacastashtîm mat-âzaiñtîm mat-peresvîm mat-paiti-peresvîm mat vakhzhibyâca patbyasca huframeretãm framaremnãm hufrâyashtãm frâyaêzyañtãm hvahmi dãm … fraxshne avi manô zrazdâtôit anghuyat haca!
1
vohu xshathrem ýazamaide, xshathrem vairîm ýazamaide, ayôxshustem ýazamaide, vaca arshuxdha vârethrakhnish daêvô-khnita ýazamaide, avat mizhdem ýazamaide, avat dasvare ýazamaide, avat baêshazem ýazamaide, avat fradathem ýazamaide, avat varedathem ýazamaide.
2
avat verethrakhnem ýazamaide ýat asti añtareca vohuxshathrãm vahishtôishtîm framereiti humatanãmca hûxtanãmca hvarshtanãmca paitishtâtêe dushmatanãmca duzhûxtanãmca duzhvarshtanãmca uzvarezâi mâvôya mithô-matanãmca mithôxtanãmca mithôvarshtanãmca. (vohu xshathrem … mithôvarshtanãmca(2).)
3
vohuxshathrayå gâthayå hañdâtâ ýazamaide, vohuxshathrayå gâthayå hâitishca afsmanâca > tåscâ ýazamaide!!

Chapter 21.

0
ashem vohû…(3). ýenghê mê ashât … mraotû. (râspî,) seraoshô idhâ astû … ýê nå ishtô. ava padhô … ashaonô ýê nå ishtô. aparaheca ýasnahe haptanghâtôish fravâkaêca > ustememcît. (zôt,) ýathâ ahû vairyô … tåscâ ýazamaide. (râspî,) ashem vohû…(3). aparahe ýasnahe haptanghâtôish hañdâtâ xshnaothra ýasnâica … mraotû. (zôt,) ahurem mazdãm ashavanem … ashem vohû…. aparem ýasnem sûrem haptanghâitîm ashavanem ashahe ratûm ýazamaide. ýenghê hâtãm…. ýazamaide vê ameshâ … tåscâ ýazamaide. (zôt,) ahurem mazdãm ashavanem ashahe ratûm … ratufritîm ýazamaide, aparem ýasnem sûrem haptanghâitîm ashavanem ashahe ratûm ýazamaide mat-afsmanem mat-vacastashtîm mat-âzaiñtîm mat-peresûm mat-paiti-peresûm mat vakhzhibyâca patbyasca huframeretem framaremnem hufrâyashtem frâyaêzyañtem hvahmi dãm … fraxshne avi manô zrazdâtôit anghuyat haca!
1
avi apãmca vanguhînãm
urvaranãmca hvawrîranãm
ashaonãmca fravashinãm
ýasnem geredhmahi vahmemca,
avi ånghãmcit ýå vanguhîsh
ýå âpô ýåsca urvarå
ýåsca ashaonãm fravashayô
ýasnem geredhmahi vahmemca.
2
avi gêush avi gayehe
avi mãthrahe speñtahe
ashaonô verezyanguhahe
ýasnem geredhmahi vahmemca,
avi tava ahura mazda
ýasnem geredhmahi vahmemca,
avi tava zarathushtra
ýasnem geredhmahi vahmemca,
avi tava ratvô bereza
ýasnem geredhmahi vahmemca,
avi ameshanãm speñtanãm
ýasnem geredhmahi vahmemca.
3
sraotemca marzhdikemca ýazamaide, sraotem vahmanem ýazamaide, marzhdikem vahmanem ýazamaide, frârâiti vîdîshe ýazamaide ýat asti añtare hvâdaênâish ashaonîsh, nemô vohu adhavîm atbaêshem ýazamaide. (avi apãmca … atbaêshem ýazamaide(2).)
4
aparem ýasnem ýazamaide, aparahe ýasnahe ýasnem ýazamaide, aparahe ýasnahe ýazamaide hâitishca afsmanâca vacasca vacastashtîmca … tåscâ ýazamaide!!

Chapter 22.

(zôt u râspî,)
1
ashem vohû…(3).
ava aibigara ava aibijareta ýâ ameshanãm speñtanãm saoshyañtãmca ashaonãm gave adhâish tâish shyaothnâish ýâish vahishtâish fraêshyâmahi,
2
ýãm ashava vanguhîm ashayãm vaêdha tãm drvå evîdhvå, mâ apaêma paourvå vayôit mâ manangha mâ vacangha mâ shyaothna mâ adha kathacina paiti jime. ashem vohû…. (aya aibigara … paiti jime. ashem vohû….(3))!!

Chapter 23.

(zôt,)
0
ahurem mazdãm ashavanem ashahe ratûm … ratufritîm ýazamaide, vahishtôishtîm gâthãm ashaonîm ashahe ratûm ýazamaide mat-afsmanãm > anghuyat haca.
1
vahishtem ahurem mazdãm ýazamaide, vahishtem ameshê speñtê ýazamaide, vahishtem narem ashavanem ýazamaide, vahishtem ashem ýazamaide, vahishta cithra ýazamaide ýâ staota ýesnya, vahishtãm îshtîm ýazamaide ýãm ashahe vahishtahe, vahishtem ahûm ashaonãm ýazamaide raocanghem vîspô-hvâthrem, vahishtahe anghêush vahishtãm ayanãm ýazamaide. (vahishtem ahurem mazdãm … vahishtãm ayanãm ýazamaide(2).)
2
vahishtôishtôish gâthayå hañdâtâ ýazamaide, vahishtôishtôish gâthayå ýazamaide hâitishca afsmanâca … tåscâ ýazamaide!!

Chapter 24.

0
ahurem mazdãm ashavanem ashahe ratûm … ratufritîm ýazamaide, airyamanem ishîm ashavanem ashahe ratûm ýazamaide mat-afsmanem mat-vacastashtîm mat-âzaiñtîm mat-peresûm mat-paiti-peresûm mat vakhzhibyâca patbyasca huframeretem framaremnem hufrâyashtem frâyaêzyañtem hvahmi dãm … fraxshne avi manô zrazdâtôit anghuyat haca. âtremca idha ahurahe … urvaråsca ýazamaide(2).
1
avat mizhdem ýazamaide, avat dasvare ýazamaide, avat baêshazem ýazamaide, avat fradathem ýazamaide, avat varedathem ýazamaide, avat verethrakhnem ýazamaide ýat asti añtare ahuna airyamana framereiti humatanãmca hûxtanãmca hvarshtanãmca paitishtâtêe
dushmatanãmca duzhûxtanãmca duzhvarshtanãmca uzvarezâi mâvôya mithô-matanãmca mithôxtanãmca mithôvarshtanãmca (avat mizhdem … mithôvarshtanãmca(4).)
2
airyamanô ishyehe hañdâtâ ýazamaide, airyamanô ishyehe ýazamaide hâitishca afsmanâca > tåscâ ýazamaide!!!!

! ! ! ! !

3
staomi ashem…. nâismî daêvô….
aêvô pañtå ýô ashahe
vîspe anyaêshãm apañtãm!

! !