Fargard 11.

1
peresat zarathushtrô ahurem mazdãm, ahura mazda … ashâum kutha nmânem ýaozhdathâni kutha âtrem kutha âpem kutha zãm kutha gãm kutha urvarãm kutha narem ashavanem kutha nâirikãm ashaonîm kutha strêsh kutha månghem kutha hvare kutha anakhra raocå kutha vîspa vohu mazdadhâta ashacithra.
2
âat mraot ahurô mazdå, ýaozhdâthrem srâvayôish zarathushtra ýaozhdâta pascaêta bun nmâna ýaozhdâta âtrem ýaozhdâta âpem ýaozhdâta zãm ýaozhdâta gãm ýaozhdâta urvarãm ýaozhdâta narem ashavanem ýaozhdâta nâirikãm ashaonîm ýaozhdâta strêsh ýaozhdâta månghem ýaozhdâta hvare ýaozhdâta anakhra raocå ýaozhdâta vîspa vohu mazdadhâta ashacithra.
3
atha imã vacô dreñjayôish ýôi anghen vârethrakhnyôtememca baêshazyôtememca pañca ahuna vairya frasrâvayôish, ýathâ ahû vairyô…(5), ahunem vairîm tanûm pâiti, ýathâ ahû vairyô … kêm-nâ mazdâ … ashahe.
4
imat nmânem ýaozhdathâne imã adha vacô framrva, at mâ ýavâ beñdvô pafre mazishtô, imat âtrem ýaozhdathâne imã adha vacô framrva, ahe thwâ âthrô verezâna paoirye pairijasâmaide mazda ahurâ.
5
imat âpem ýaozhdathâne imã adha vacô framrva, apô at ýazamaide maêkaiñtîshcâ hêbvañtîshcâ fravazanghô, imat zãm ýaozhdathâne imã adha vacô framrva, imãm âat zãm genâbîsh hathrâ ýazamaide.
6
imãm gãm ýaozhdathâne imã adha vacô framrva, gave adhâish tâish shyaothnâish ýâish vahishtâish fraêshyâmahî, imat urvarãm ýaozhdathâne imã adha vacô framrva, at ah’yâi ashâ mazdå urvarå vaxshat.
7
imat narem ashavanem ýaozhdathâne imat nâirikãm ashaonîm ýaozhdathâne imã adha vacô framrva, â airyêmâ ishyô rafedhrâi jañtû nerebyascâ nâiribyascâ zarathushtrahe vanghêush rafedhrâi mananghô ýâ daênâ vairîm hanât mîzhdem ashahyâ ýâsâ ashîm ýãm ishyãm ahurô masatâ mazdå.
8
atha imã vacô … ashta ahuna vairya frasrâvayôish, ýathâ ahû vairyô…(8). kêm-nâ mazdâ … ashahe.
9
perene aêshmem perene nasûm perene hãm- raêthwem perene paiti-raêthwem perene xrû perene xrvikhni perene bûidhi perene bûidhizha perene kuñdi perene kuñdizha perene bûshyãsta ýâ zairina perene bûshyãsta ýâ darekhô-gava perene mûidhi perene kapastish perene pairikãm ýâ âiti âtrem âpem zãm gãm urvarãm perene âhitîm ýâ âiti âtrem âpem zãm gãm urvarå.
10
perene thwâ duzhda angra mainyô haca nmânat haca âthrat haca apat haca zemat haca gaot haca urvarayât haca narem ashavanem haca nâirikãm ashaonîm haca strêsh haca månghem haca hvare haca anakhra raocå haca vîspa vohu mazdadhâta ashacithra.
11
atha imã vacô … cathwârô ahuna vairya frasrâvayôish, ýathâ ahû vairyô…(4), kêm-nâ mazdâ … ashahe.
12
parshta aêshmem parshta nasûm parshta hãm- raêthwem parshta paiti-raêthwem parshta xrû parshta xrvikhni parshta bûidhi parshta bûidhizha parshta kuñdi parshta kuñdizha parshta bûshyãsta ýâ zairina parshta bûshyãsta ýâ darekhô-gava parshta mûidhi parshta kapastish parshta pairikãm ýâ âiti âtrem âpem zãm gãm urvarãm parshta âhitîm ýâ âiti âtrem âpem zãm gãm urvarå
13
parshta thwâ duzhda angra mainyô haca nmânat haca âthrat haca apat haca zemat haca gaot haca urvarayât haca narem ashavanem haca nâirikãm ashaonîm haca strêsh haca månghem haca hvare haca anakhra raocå haca vîspa vohu mazdadhâta ashacithra.
14
atha imã vacô … cathwârô mazdâ at môi frasrâvayôish, mazdâ at môi…(4).
15-16
perene aêshmem….
17
atha imã vacô … pañca ahuna vairya frasrâvayôish, ýathâ ahû vairyô…(5), kêm-nâ mazdâ … ashahe! ashem vohû…!!

Fargard 12.

1
[âat ýat pitô para-irithyeiti mâta vâ para-irithyeiti cvat aêshãm upa-mãnayen puthrô haca pitarem dukhdha haca mâtarem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm.
2
dâtare … kutha nmânem ýaozhdathâmi kutha bun ýaozhdâta, âat mraot ahurô mazdå, thrish frasnâiti tanunãm thrish frasnâiti vastranãm thrish frasrûiti gâthanãm imå nô âtrem ýazaêta baresma sterenaêta aiwyô vanguhibyô zaothrå baraêta, ýaozhdâta pascaêta bun nmâna vasô upâiti apãm vasô upâiti urvaranãm vasô upâiti ameshanãm speñtanãm spitama zarathushtra.
3-4
âat ýat puthrô para-irithyeiti dukhdha vâ para- irithyeiti cvat aêshãm upa-mãnayen pita haca puthrem mâta haca dukhdharem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm. dâtare….
5-6
âat ýat brâta para-irithyeiti hvangha vâ para- irithyeiti cvat aêshãm upa-mãnayen brâta haca hvangharem hvangha haca brâtarem cvat dahmanãm cvat tanu-perethanãm, âat mraot ahurô mazdå, thrisatem dahmanãm xshvashtîm tanu-perethanãm. dâtare….
7-8
âat ýat nmânô-paitish para-irithyeiti nmânô-pathni vâ para-irithyeiti cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, xshvash månghô dahmanãm dvadasa tanu-perethanãm kainînô hvatô puthrem. dâtare….
9-10
âat ýat nyâkô para-irithyeiti nyâke vâ para-irithyeiti cvat aêshãm upa-mãnayen napô haca nyâkô napti haca nyâke cvat dahmanãm cvat tanu-perethanãm, âat mraot ahurô mazdå, pañcâca vîsatica dahmanãm pañcâsatem tanu-perethanãm. dâtare….
11-12
âat ýat napô para-irithyeiti napti vâ para- irithyeiti cvat aêshãm upa-mãnayen nyâkô haca naptô nyâke haca napti cvat dahmanãm cvat tanu-perethanãm, âat mraot ahurô mazdå, pañcâca vîsatica dahmanãm pañcâsatem tanu-perethanãm. dâtare….
13-14
âat ýat brâtruyô para-irithyeiti brâtruye vâ para-irithyeiti cvat aêshãm upa-mãnayen cvat dahmanãm cvat tanu- perethanãm, âat mraot ahurô mazdå, vîsaiti dahmanãm cathwaresatem tanu-perethanãm. dâtare….
15-16
âat ýat tûiryô para-irithyeiti tûirya vâ para-irithyeiti cvat aêshãm upa-mãnayen cvat dahmanãm cvat tanu- perethanãm, âat mraot ahurô mazdå, pañca-dasa dahmanãm thrisatem tanu-perethanãm. dâtare….
17-18
âat ýat tûiryô puthrô para-irithyeiti tûirya dukhdha vâ para-irithyeiti cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, dasa dahmanãm vîsaiti tanu-perethanãm. dâtare….
19-20
âat ýat tûirya puthrô vâ puthrô para-irithyeiti tûirya dukhdhairi cvat aêshãm upa-mãnayen cvat dahmanãm cvat tanu-perethanãm, âat mraot ahurô mazdå, pañca dahmanãm dasa tanu-perethanãm. dâtare….
21
âat ýat kãmcit vâ taoxmanãm para- irithyeiti ýatha ainyô-varena ainyô-tkaêsha cvat speñtahe mainyêush dâmanãm hãm-raêthwayeiti cvat paiti-raêthwayeiti.
22-24
âat mraot ahurô mazdå, ýatha vazakhacit … nôit avatha meretô!
ashem vohû…!!]

Fargard 13.

1
kat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô mainyush paiti-jasaiti.
2
âat mraot ahurô mazdå spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite, aêtat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô-mainyush paiti-jasaiti.
3
ýasca dim janat spitama zarathushtra spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite nava-naptyaêcit hê urvânem para-mereñcaite ýaêshãm anghat duzhâpîm cinvat-peretûm ýô nôit jvô sraoshyãm uzverezyeiti.
4
dâtare … ýô janat spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite kâ hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya.
5
kat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
6
âat mraot ahurô mazdå, daêum ýim zairimyangurem nãma spitama zarathushtra ýim mashyâka avi duzhvacanghô zairimyâkem nãma aojaite, aêtat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
7
ýasca dim janat spitama zarathushtra daêum ýim zairimyangurem ýim mashyâka avi duzhvacanghô zairimyâkem nãma aojaite patitem hê manô anghat patitem vacô patitem shyaothnem uzvarshtem hê manô anghat uzvarshtem vacô uzvarshtem shyaothnem!
8
ýô aêtaêshãm sûnãm jaiñti ýim pasush-haurvãmca vishhaurvãmca vohunazgãmca draxtô-hunaranãmca xraosyô-taraca nô ahmât voyô-taraca hvô urva parâiti parô-asnâi anguhe
ýatha vehrkô vayôi tûite
dramne barezishte razûire.
9
nôit hê anyô urva haom urvânem paiti irista bãzaiti xraosyâca voyaca anguhe naêdha spâna peshu-pâna paiti irista bãzaiti xraosyâca voyaca anguhe.
10
ýô sûne pishtrem jaiñti ýim pasush-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå gaêthå tâyush vâ vehrkô vâ apaiti-busti haca gaêthâbyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
11
ýô sûne pishtrem jaiñti ýim vîsh-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå vîsô tâyush vâ vehrkô vâ apaiti-busti haca vîzhibyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
12
dâtare … ýô spânem jaiñti ýim pasush-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, ashta sata upâzananãm upâzôit aspahe ashtraya ashta sata sraoshô-caranaya.
13
dâtare … ýô spânem jaiñti ýim vish-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya.
14
dâtare … ýô spânem jaiñti ýim vohunazgem frazâbaodhanghem snathem vîkeret-ushtânem kâ hê asti citha, âat mraot ahurô mazdå, xshvash sata….
15
dâtare … ýô spânem jaiñti ýim taurunem frazâbaodhanghem snathem vîkeret-ushtânem kâ hê asti citha, âat mraot ahurô mazdå, pañca sata….
16
hâu jazhâush hâu vîzâush hâu sukurenahe hâu urupish tizhi-dâtahe hâu raopish ýaonô-hvatahe hâu vîspanãm speñtô-mainyavanãm spacithranãm anya udra upâpa!
17
dâtare … dva asti spâ pasush-haurvô dâityô-gâtush, âat mraot ahurô mazdå, ýô ýûjyastîm haca gaêthâbyô parâiti sraêshemnô tâyûsh vehrkemca.
18
dâtare … kva asti spâ vish-haurvô dâityô-gâtush, âat mraot ahurô mazdå, ýô hâthrô-masanghem adhwanem haca vîzhibyô parâiti sraêshemnô tâyûsh vehrkemca.
19
dâtare … kva asti spâ vohunazgô dâityô-gâtush, âat mraot ahurô mazdå, ýô naêcim isaiti hunaranãm tanuye isaite thrâthrem!
20
dâtare … ýô spânem tarô-pithwem daste ýim pasush-haurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti fratemô-nmânahe nmânô-paitîm paiti tarô-pithwem daithyât atha âstryeiti.
21
dâtare … ýô spânem tarô-pithwem daste ýim vishhaurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti madhemô-nmânahe nmânô-paitîm paiti tarô-pithwem daithyât atha âstryeiti.
22
dâtare … ýô spânem tarô-pithwem daste ýim vohunazgem cvat aêtaêshãm shyaothnanãm âstâraiti, âat mraot ahurô mazdå, narem bôit idha ashavanem jaseñti ahmya nmâne mat avabyô daxshtâbyô ýatha âthrava paiti tarô-pithwem daithyât atha âstryeiti.
23
dâtare … ýô spânem tarô-pithwem daste ýim taurunem cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti aperenâyûkem dahmô-keretem shyaothnâvarezem verezyât shyaothnem paiti tarô-pithwem daithyât atha âstryeiti.
24
dâtare … ýô spânem tarô-pithwem daste ýim pasush-haurum kâ hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
25
dâtare … ýô spânem tarô-pithwem daste ýim vishhaurum kâ hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.
26
dâtare … ýô spânem tarô-pithwem daste ýim vohunazgem kâ hê asti citha, âat mraot ahurô mazdå, haptâitîm upâzananãm….
27
dâtare … ýô spânem tarô-pithwem daste ýim taurunem kâ hê asti citha, âat mraot ahurô mazdå, pañcâsatem upâzananãm….
28
aêtem zî aêtahmi anghvô ýat astvaiñti spitama zarathushtra speñtahe mainyêush dâmanãm âsishtem zaurvânem upâiti ýat spânô ýôi hishteñte ahvarô upa hvareñtem parô spasânô eviñdânô parô xshvisca âzûitishca gêush mat baratu hvarethanãm sûnahe aêvahe dâityô-pithwem.
29
dâtare … ýat ahmi nmâne ýat mâzdayasnôish spâ avacå vâ bavat adhâityô-xratush kutha tê verezyãn aête ýôi mazdayasna.
30
âat mraot ahurô mazdå, ava hê barayen tâshtem dâuru upa-tãm manaothrîm stamanem hê adhât nyâzayen ishti-masô xraozhdvahe bish aêtavatô varedvahe.
31
aêtahmâtcit nidarezayen frâ-hîmcit nidarezayen ýezi nôit spâ avacå vâ adhâityô-xratush pasûm vâ narem vâ raêshyât para hê irishiñtô raêshem cikayat baodhô-varshtahe cithaya.
32
paoirîm pasûm avakhnât paoirîm narem raêshyât dashinem hê gaoshem upa-thweresayen bitîm pasûm avakhnât bitîm narem raêshyât hôyum hê gaoshem upa-thweresayen.
33
thritîm pasûm avakhnât thritîm narem raêshyât dashinem hê paidhyãm upa-kereñtayen tûirîm pasûm avakhnât tûirîm narem raêshyât haoyãm hê paidhyãm upa-kereñtayen.
34
puxdhem pasûm avakhnât puxdhem narem raêshyât dumemcit hê upa-thweresayen, aêtahmâtcit nidarezayen … cithaya.
35
dâtare … ýat ahmi nmâne ýat mâzdayasnôish spâ ahãm-baodhemnô vâ bavat adhâityô-xratush kutha tê verezyãn aête ýôi mazdayasna, âat mraot ahurô mazdå, avatha hê baêshazem upôisayen ýatha dahmâicit ashaone.
36
dâtare … ýezi isemnô nôit viñdâite kutha tê verezyãn aête ýôi mazdayasna.
37
âat mraot ahurô mazdå, ava hê barayen … frâ-hîmcit nidarezayen ýezi nôit spâ ahãm-baodhemnô maêkhe vâ câiti vâ vaêmi vâ urûidhi vâ apô vâ nâvayå paidhyâite ahmat haca irishyât,
38
ýezi tat paiti irishyeiti ainghat haca shyaothnâvareza atha bavaiñti peshô-tanvô!
39
spânem dathem zarathushtra
azem ýô ahurô mazdå
hvâvastrem hvâ-aothrem
zaêni-budhrem tizhi-dãsurem vîrô-draonanghem gaêthanãm harethrâi, adha azem ýô ahurô mazdå spânem nidathem ýat dim mazaosh kehrpô tûrahe ýezi asta asha xrathwa ýezi asta gaêthâbyô.
40
ýasca hê spitama zarathushtra vâcim paiti zaênish anghat nôit hê tå vîspô tâyush vâ vehrkô vâ apaiti-busti haca vîzhibyô para-baraiti, jãthwa vehrka scãthwa vehrka pôithwa vehrka snaêzhana!
41
dâtare … katârô zî ayå vehrkayå jãthwô-tarô anghen ashâum ahura mazda ýatha spâ vehrkahe kerenaoiti ýatha ýat vehrkô spâ, âat mraot ahurô mazdå, aêshô zî aêtayå vehrkayå jãthwô-tarô anghen ashâum zarathushtra ýatha spâ vehrkahe kerenaoiti ýatha ýat vehrkô spâ.
42
ustâcit spâna pateñti pasush-haurvãmca vish-haurvãmca vohunazgãmca draxtô-hunaranãmca ýatha-khnyô gaêthâbyô taêcit ýå bavaiñti aoshô-tarasca duzhitô-tarasca gaêthô- jatarasca ýatha anya spâ.
43
ustâcit vehrka pateñti khnyô gaêthâbyô taêcit ýå bavaiñti aoshô-tarasca duzhitô-tarasca gaêthô-jatarasca ýatha anya vehrka!
44
sûnahe aêvahe ashtâ bifrem, asti shê haêm ýatha athaurune asti-shê haêm ýatha rathaêshtârahe asti-shê haêm ýatha vâstryehe fshuyañtô asti-shê haêm ýatha vaêsâush asti shê haêm ýatha tâyaosh asti-shê haêm ýatha disaosh asti-shê haêm ýatha jahikayå asti-shê haêm ýatha aperenâyûkahe.
45
paiti hvaretha hvaraiti ýatha âthrava huxshnaothrô ýatha âthrava hvâzârô ýatha âthrava aêshô kasu draonô ýatha âthrava aiti-shê haêm ýatha athaurune, raptô paurvaêibya ýatha rathaêshtå aipi- jatô gãm hudhånghem ýatha rathaêshtå parô pasca nmânahe ýatha rathaêshtå aiti shê haêm ýatha rathaêshtârahe.
46
zaênangha evîspô-hvafna ýatha vâstryô fshuyãs parô pasca nmânahe ýatha vâstryô fshuyãs pasca parô nmânahe ýatha vâstryô fshuyãs aiti-shê haêm ýatha vâstryehe fshuyañtô, hvañdrakarô ýatha vaêsô asnaêraêshô ýatha vaêsô zairimyafsma thryafsma ýatha vaêsô aiti shê haêm ýatha vaêsâush.
47
tãthrô-cinô ýatha tâyush xshapâyaonô ýatha tâyush apishma-hvarô ýatha tâyush athaca duzhnidhâtô ýatha tâyush aiti- shê haêm ýatha tâyaosh, tãthrô-cinô ýatha disush xshapâyaonô ýatha disush apishma-hvarô ýatha disush athaca duzhnidhâtô ýatha disush aiti-shê haêm ýatha disâush.
48
hvañdrakarô ýatha jahika asnaêraêshô ýatha jahika airitô pañtânem ýatha jahika zairimyafsma thryafsma ýatha jahika aiti-shê haêm ýatha jahikayå, hvafnô ýatha aperenâyush snaêzhanô ýatha aperenâyush hizu-drâjô ýatha aperenâyush pairi-taxtô paurvaêibya ýatha aperenâyush aiti-shê haêm ýatha aperenâyûkahe.
49
ýat mê aêshãmcit nmânanãmca caratô dva mâ apa-raodhayaêta ýasca spâ pasush-haurvô ýasca spâ vish- haurvô, nôit mê nmânem vîdhâtô hishteñti zãm paiti ahuradhâtãm ýezi mê nôit ånghât spâ pasush-haurvô vâ vishhaurvô vâ!
50
dâtare … ýat sûnîsh para-irithyeiti nishtâ-zemanasca pairishtâ-xshudrasca kutha aêshãm baodhô jasaiti.
51
âat mraot ahurô mazdå, xå paiti apãm parâiti spitama zarathushtra athra ånghãm hãm-bavaiñti dva udra upâpa hazangrâish sûnîsh strî- nâmanô hazangrâish sûnîsh nairyô-nâmanô mithwana strica nairyasca, udrahe avakhnânô haêcô kerenaoiti ýat avâstrem.
52
para nû ahmât haca asanghatca shôithrâatca axshtat spitama zarathushtra izhâca âzûitishca para dasvareca baêshazemca para fradathemca varedathemca vaxshathemca para ýavanãmca vâstranãmca uruthem.
53
dâtare … kadha-nô ahmâi asanghaêca shôithraêca paiti-jasâtô izhâca âzûitishca kadha dasvareca baêshazemca kadha fradathemca varedathemca vaxshathemca kadha ýavanãmca vâstranãmca uruthem.
54
âat mraot ahurô mazdå, nôit nû para ahmât spitama zarathushtra asanghaêca shôithrâica paiti-jasâtô izhâca âzûitishca nôit dasvareca baêshazemca nôit fradathemca varedathemca vaxshathemca nôit ýavanãmca vâstranãmca uruthem.
55
para ahmât ýat idha udra-janô hathra jatô nijanâite ýat vâ aêtahe udrahe upa dahmem urvânem frâyazåñte thri-ayarem thri-xshaparem saociñtat paiti âthrat frasteretât paiti baresmen uzdâtât paiti haomât.
56
pascaêta ahmâi asanghaêca shôithraêca paiti-jasâtô izhâca âzûitishca pascaêta dasvareca baêshazemca pascaêta fradathemca varedathemca vaxshathemca pascaêta ýavanãmca vâstranãmca uruthem! ashem vohû…!!

Fargard 14.

1
peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum ýô udrem jaiñti ýim upâpem hazangrâishsûnîsh strî-nâmanô hazangrâish sûnîsh nairyô-nâmanô frazâbaodhanghem snathem vîkeret-ushtânem kâ hê asti citha.
2
âat mraot ahurô mazdå, baêvare upâzananãm upâzôit aspahe ashtraya baêvare sraoshô-caranaya baêvare vazyanãm aêsmanãm xraozhdvanãm hushatãm pairîshtanãm âthre ahurahe mazdå ashaya vanghuya urune cithîm nisirinuyât.
3
baêvare vazyanãm aêsmanãm varedvanãm urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm âthre ahurahe mazdå ashaya vanghuya urune cithîm nisirinuyât.
4
baêvare frasteretanãm baresmaine frastairyât baêvare zaothranãm haomavaitinãm gaomavaitinãm ýaozhdâtanãm pairi-angharshtanãm dahmô-ýaozhdâtanãm dahmô-pairi-angharshtanãm hãm-irista aêtayå urvarayå ýâ vaoce hadhânaêpâta aiwyô vanguhibyô ashaya vanghuya urune cithîm nisirinuyât.
5
baêvare azhinãm udarô-thrãsanãm ava-janyât baêvare azhinãm spakanãm kahrpunanãm ava-janyât baêvare kasyapanãm ava-janyât baêvare vazakhanãm dâdhmainyanãm ava-janyât baêvare vazakhanãm upâpanãm ava-janyât baêvare maoirinãm dânô-karshanãm ava-janyât baêvare maoirinãm araêkanãm kutakanãm duzhaininãm ava-janyât.
6
baêvare pazdunãm gûthô-varetanãm ava-janyât baêvare maxshinãm erekhaitinãm ava-janyât baêvare makhanãm irimaitinãm ainghå zemô aipi-kanyât bish hapta âthrô daxshtem nerebyô ashavabyô ashaya vanghuya urune cithîm nisirinuyât.
7
âtre-carana pairish-hanâna ýaozhdâni garemô-skarana âtre-vazanem hikaranem vîkusrem adharât naêmât hañkusrem uparât naêmât tashem tizhi-dârem tizhi-zhnûtem vadem tizhi- bârem tizhi-zhnûtem nerebyô ashavabyô ashaya vanghuya urune cithîm nisirinuyât ýaêibyô aête mazdayasna âthre ahurahe mazdå aêsmã pairisheñte.
8
vîspe zaya athaurune nerebyô ashavabyô ashaya vanghuya urune cithîm nisirinuyât ýaêshãm zayanãm athaurune ashtra gaoidhi paiti-dânô xrafstrakhnem sraoshô-caranaya urunya raêthwish-bajina havana dâityô-kereta tashta haomya baresmaca.
9
vîspe zaya rathôishti nerebyô ashavabyô ashaya vanghuya urune cithîm nisirinuyât ýaêshãm zayanãm rathôishti paoiryô arshtish bityô karetô thrityô vazrô tûirya thanvare puxdha zaênâush mat akana mat thrisãs ayô-akhrâish xshtvî fradaxshana snâvare-bâzura mat thrisãs fradaxshanyâish haptathô zrâdhô ashtemô kûiris nâumô paiti-dânô dasemô sâravârô aêvañdasô kamara dvadasô rânapô.
10
vîspe zaya vâstryô fshuyãs nerebyô ashavabyô ashaya vanghuya urune cithîm nisirinuyât ýaêshãm zayanãm vâstryehe fshuyañtô aêsha ýuyô-semi ayazhâna paiti-darezâna gavâzishta gavâzô asmana hâvana ýâvarenem zgeresnô-vakhdhanem
11
kãstrem paitish-herezem verezayañtem hakeret erezatem hakeret zaranim, dâtare … cvat ýavat erezatem, âat mraot ahurô mazdå, ýatha aspahe arshnô pereska, dâtare … cvat ýavat zaranim, âat mraot ahurô mazdå, ýatha ushtrahe arshnô pereska.
12
vaidhîm taci-apãm nerebyô ashavabyô ashaya vanghuya urune cithîm nisirinuyât, dâtare … cvat ýavat vaidhîm, âat mraot ahurô mazdå, spâ-barezem spâ-frathem.
13
zãm karshyãm raodhayãm nerebyô ashavabyô ashaya vanghuya urune cithîm nisirinuyât, dâtare … cvat ýavat zå, âat mraot ahurô mazdå, ýavat aêsha âfsh byârixti upa-thwarshti frabavât.
14
nmânem gâvayanem nava-hâthrem nava-nematem nerebyô ashavabyô ashaya vanghuya urune cithîm nisirinuyât, dâtare … cvat ýavat nmânem, âat mraot ahurô mazdå, dvadasa vîtâra upema nava vîtâra madhema xshvash vîtâra nitema gâtu hvaini staretu mat barezisha nerebyô ashavabyô ashaya vanghuya urune cithîm nisirinuyât.
15
kanyãm askeñdãm anupayatãm nerebyô ashavabyô ashaya vanghuya urune cithîm nisirinuyât, dâtare … kâ ýâ kaine, âat mraot ahurô mazdå, hvangha vâ dukhdha vâ nâmêni mat gaoshâvare pasca pañca-dasîm saredhem nerebyô ashavabyô nâirithwana upa-vâdhayaêta.
16
bish hapta pasvô anumaya nerebyô ashavabyô ashaya vanghuya urune cithîm nisirinuyât, bish hapta puthrãm gadhwãm uzjâmôit bish hapta peshavô fraoirisyôit tarasca âpô nâvayå.
17
duye navaiti astanãm adhâityô- angharethranãm dâitîm ahmâicit harethrem kerenuyât duye navaiti gadhwãm pairi- ýaozhdaithîta stiptibyasca anâiritibyasca vyanguraêibyasca vîspaêibyasca pairi acishtaêibyô ýôi gadhwãm pairi-bavaiti, duye navaiti narãm ashaonãm vâstryaêta gêush vâ hvarethahe vâ hurayå vâ madhush vâ.
18
hâ hê asti citha hâ hê asti âperetish aipi-pâremnâi idha ashaone nôit anaipi-pâremnâi drujô nmâne haithyâ anghen astayô! ashem vohû…!!

Fargard 15.

1
caiti tâ shyaothna varshta ýâ anghush astvå verezyeiti fraêta apatita anuzvarshta ainghat haca shyaothnâvareza atha bavaiñti peshô-tanva.
2
âat mraot ahurô mazdå, pañca ashâum zarathushtra, paoirîm aêtaêshãm shyaothnanãm ýôi vereziñti mashyâka ýô narem ashavanem anyô-varenâi vâ anyô-tkaêshâi vâ kasyanghe sanghâi dadhâiti vîdhvå avat hava xrathwa parâiti ainghat haca shyaothnâvareza atha bavaiñti peshô-tanva.
3
bitîm aêtaêshãm shyaothnanãm ýôi vereziñti mashyâka ýô sûne ýim pasush-haurve vâ vish-haurve vâ astanãm ahmarshtanãm dadhâiti garemanãm vâ hvarethanãm,
4
ýezica aête asti dâtâhva aråñte garemôhva vîdhåñte ýat vâ aête garema hvaretha stamanem vâ hizvãm vâ apa-dazhat ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva.
5
thritîm aêtaêshãm shyaothnanãm ýôi vereziñti mashyâka ýô gadhwãm ýãm aputhrãm janaiti vâ vayeiti vâ xraosyeiti vâ pazdayeiti vâ.
6
ýezica aêsha gadhwa maêkhe vâ câiti vâ vaêmi vâ urûidhi vâ apô vâ nâvayå paidhyâite ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva.
7
tûirîm aêtaêshãm shyaothnanãm ýôi vereziñti mashyâka ýô nâirikãm cithravaitîm daxshtavaitîm vohunavaitîm xshudrå avi frangherezaiti ainghat haca shyaothnâvareza atha bavaiñti peshô-tanva.
8
puxdhem aêtaêshãm shyaothnanãm ýôi vereziñti mashyâka ýô nâirikãm ýãm aputhrãm pipyûshîm vâ apipyûshîm vâ anasaxtãm para xshudrå avi frangherezaiti ahmat haca irishyât ýezi tat paiti irishyeiti ainghat haca shyaothnâvareza atha bavaiñti peshô-tanva!
9
ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti mâ-nô aêsha ýâ kaine mashyânãm parô fsharemât tarô daxshtem pârayât tarô apemca urvarãmca.
10
ýezica aêsha ýâ kaine mashyânãm parô fsharemât tarô daxshtem parâiti tarô apemca urvarãmca aêtahmâyush paiti varshta shyaothna.
11
ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti mâ-nô aêsha ýâ kaine mashyânãm parô fsharemât hvatô garewem raêshayât.
12
ýezica aêsha ýâ kaine mashyânãm parô fsharemât hvatô garewem irishyeiti pterebyô âstryeiti pterebyô irishyeiti pterebyô irishiñtãm raêshê cikaên baodhô- varshtahe cithaya.
13
ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti ýezica vaocât aêsha ýâ kaine, puthrem aêm narô varshta ýezica vaocât aêshô nâ hanãm aêtaêshãm jîjishanguha peresanguha
14
aêtadha aêsha ýâ kaine hanãm aêtaêshãm jîjishâiti peresâiti aêsha hana frabaraiti banghem vâ shaêtem vâ khnânem vâ fraspâtem vâ kãmcit vâ vîtâcinanãm urvaranãm, aêtahmât puthrât mimarexshanguha aêtadha aêsha ýâ kaine aêtahmât puthrât mimarxshâite havañta aêtahe shyaothnahe verezyãn nâca kainica hanâca.
15
ýô kainînem upâiti stâtô- ratûm vâ astâtô-ratûm vâ paradâtãm vâ aparadâtãm vâ puthrãmca hê dadhâiti vîspem â ahmât thrâthrem kerenavât ýat aêsha ýô aperenâyûkô uzjasât.
16
ýezi nôit harethrem baraiti aêtadha aêsha ýô aperenâyûkô adhâityô-angharethrem irishyât para hê irishiñtô raêshem cikayat baodhô-varshtahe cithaya.
17
dâtare … ýezi tat frajasât añtare sairi varezâne kahmât mazdayasnanãm harethrem barât,
18
âat mraot ahurô mazdå, ýô kainînem upâiti stâtô-ratûm vâ astâtô-ratûm vâ paradâtãm vâ aparadâtãm vâ vîspem â ahmât thrâthrem kerenavât ýat aêsha ýô aperenâyûkô uzjasât.
19
ýezi nôit harethrem baraiti aêtadha hê vîspå hâirishîsh frâshnaoiti bipaitishtanaca cathware-paitishtanaca [aêsha bipaitishtâna ýâ kaine aêsha cathware- paitishtâna ýâ gadhwa.]
20
dâtare … ýezi tat frajasât añtare sairi varezâne kahmât mazdayasnanãm harethrem barât.
21
âat mraot ahurô mazdå, ýô hê anghat nazdishtem nmânem uzdasta aêtahmâyush paiti harethrem vîspem â ahmât thrâthrem kerenavât ýat aête ýôi spâna uzjasãn.
22
ýezi nôit harethrem baraiti aêtadha aête ýôi spâna adhâityô-angharethrem irishyãn para aêshãm irishiñtãm raêshê cikaên baodhô-varshtahe cithaya.
23
dâtare … ýezica aêsha gadhwa ushtrô- stânaêshva frajasât kahmât mazdayasnanãm harethrem barât.
24-25
âat mraot ahurô mazdå, ýô aêtem ushtrô-stânem uzdasta ýenghå vô aêshô ushtrô-stânish anghat aêtahmâyush paiti harethrem vîspem â ahmât….
26
dâtare … ýezica aêsha gadhwa aspô- stânaêshva frajasât kahmât mazdayasnanãm harethrem barât.
27-28
âat mraot ahurô mazdå, ýô aêtem aspô-stânem uzdasta ýenghå vô aêshô aspô-stânish anghat aêtahmâyush paiti harethrem vîspem â ahmât….
29
dâtare … ýezica aêsha gadhwa gavô- stânaêshva frajasât kahmât mazdayasnanãm harethrem barât.
30-31
âat mraot ahurô mazdå, ýô aêtem gavô-stânem uzdasta ýenghå vô aêshô gavô-stânish anghat aêtahmâyush paiti harethrem vîspem â ahmât….
32
dâtare … ýezica aêsha gadhwa pasush- hastaêshva frajasât kahmât mazdayasnanãm harethrem barât.
33-34
âat mraot ahurô mazdå, ýô aêtem pasush-hastem uzdasta ýenghå vô aêshô pasush-hastish anghat aêtahmâyush paiti harethrem vîspem â ahmât….
35
dâtare … ýezica aêsha gadhwa uzdaêzaêshva frajasât kahmât mazdayasnanãm harethrem barât.
36-37
âat mraot ahurô mazdå, ýô aêtem uzdaêzem uzdishta ýenghå vô aêshô uzdaêzish anghat aêtahmâyush paiti harethrem vîspem â ahmât….
38
dâtare … ýezica aêsha gadhwa avakañtaêshva frajasât kahmât mazdayasnanãm harethrem barât.
39
âat mraot ahurô mazdå, ýô aêtem avakanem avakañta ýenghå vô aêshô avakanish anghat aêtahmâyush paiti harethrem vîspem â ahmât thrâthrem kerenavât ýat aête ýôi spâna uzjasãn.
40
ýezi nôit harethrem baraiti aêtadha aête ýôi spâna adhâityô-angharethrem irishyãn para aêshãm irishiñtãm raêshê cikaên baodhô-varshtahe cithaya.
41
dâtare … ýezica aêsha gadhwa avi madheme vâ vâstre vâ frajasât kahmât mazdayasnanãm harethrem barât.
42
âat mraot ahurô mazdå, ýô aêtem vâstri uzdasta ýenghå vô aêshô vâstrish anghat aêtahmâyush paiti harethrem,
43
upâca hê gâtûm barayen nemô vañtâhva kãmcit vâ staretaêshinãm vîspem â ahmât thrâthrem kerenavât ýat aête ýôi spâna hvâ-zaênem hvâ-draonem bavãn.
44
dâtare … katha aête spâna hvâ-zaênem hvâ-draonem bavãn.
45
âat mraot ahurô mazdå, ýavat aête spâna bish hapta nmâna pairi tacahi bavãn, vasô pascaêta fraxshtâite aiwi-gâme itha hama, xshvash månghô sûnô thrâthrem hapta saredha aperenâyûkahe âthrô ahurahe mazdå puthrem avatha nâirikayâi!
46
dâtare … ashâum ýezi vasen mazdayasna jvô-daxshtem maêthmanem kutha tê verezyãn aête ýôi mazdayasna.
47
âat mraot ahurô mazdå, aêtadha hê aête mazdayasna ainghå zemô ava-kanem ava-kanayen maidhyôi pasush-hastaêshva maidhyôi paitishtâne xrûzhdisme maidhyôi narsh varedusme.
48
paoiryâi nidarezayen aperenâyûkem avatha âtrem ahurahe mazdå puthrem vîspem â ahmât thrâthrem kerenavât ýavat aêshô spâ anya jasô aiwica aparem patica aparem apâca paurvaêibya nôit dim avatha irishyãn.
49
ýô gadhwãm ýãm aputhrãm thrayãm bâuzdri barethrica puthrâca paêmainica ayatâca taêca aêtadhaca puthrem baraiti sûnãm bâuzdri.
50
dâtare … ýô gadhwãm jaiñti ýãm aputhrãm thrayãm bâuzdri barethrica puthrâca paêmainica ayatâca taêca aêtadhaca puthrem baraiti sûnãm bâuzdri kâ hê asti citha.
51
âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya!
ashem vohû…!!

Fargard 16.

1
dâtare gaêthanãm astvaitinãm ashâum ýat ahmi nmâne ýat mâzdayasnôish nâirika cithravaiti daxshtavaiti vohunavaiti nishhidhât kutha tê verezyãn aête ýôi mazdayasna.
2
âat mraot ahurô mazdå, aêtadha hê aête mazdayasna pañta vîcinaêta pairi urvarâbyasca varedhâbyasca aêsmaêibyô hiku pãsnu gâtu nidhayaêta fratara haca nmâna verezyãn ýat vâ naêmem ýat vâ thrishum ýat vâ cathrushum ýat vâ pangtanghum ýezi nôit nâirika âtrem aiwi- vaênât ýezi nôit nâirika âthre raoxshnãn paiti-didhyât.
3
dâtare … cvat drâjô haca âthrat cvat drâjô haca apat cvat drâjô haca baresmen frastairyât cvat drâjô haca nerebyô ashavabyô.
4
âat mraot ahurô mazdå, pañca-dasa-gâim haca âthrat pañca-dasa-gâim haca apat pañca-dasa-gâim haca baresmen frastairyât thrigâim haca nerebyô ashavabyô.
5
dâtare … cvat drâjô ava-hishtât aêsha ýô nâirikayå cithravaityå daxshtavaityå vohunavaityå hvarethem frabarât.
6
âat mraot ahurô mazdå, thrigâim ava-hishtât aêsha ýô nâirikayå cithravaityå daxshtavaityå vohunavaityå hvarethem frabarât cinem hvarethem frabarât cinem ýaom frabarât ayanghaênem vâ srum vâ nitema xshathra vairya.
7
cvat hvarethem frabarât cvat ýaom frabarât, dva danare tâyûirinãm aêva danare xshaodrinãm ýezi nôit nâirika niuruidhyât, ýezi aperenâyûkô frâshnavât zasta hê paoirîm frasnâdhayen aêtahe ýat aperenâyûkahe ahe havayåse tanvô.
8
ýezi nâirika vohunîsh aiwi-vaênât ýat hê thrâyô xshafna sacåñte airime gâtûm hê nishhidhaêta vîspem â ahmât ýat hê cathwârô xshafna sacåñte, ýezi nâirika vohunîsh aiwi-vaênât ýat hê cathwârô xshafna sacåñte airime gâtûm hê nishhidhaêta vîspem â ahmât ýat hê pañca xshafna sacåñte.
9
ýezi nâirika vohunîsh aiwi-vaênât ýat hê pañca xshafna sacåñte airime gâtûm hê nishhidhaêta vîspem â ahmât ýat hê xshvash xshafna sacåñte, ýezi nâirika vohunîsh aiwi-vaênât ýat hê xshvash xshafna sacåñte airime gâtûm hê nishhidhaêta vîspem â ahmât ýat hê hapta xshafna sacåñte.
10
ýezi nâirika vohunîsh aiwi-vaênât ýat hê hapta xshafna sacåñte airime gâtûm hê nishhidhaêta vîspem â ahmât ýat hê ashta xshafna sacåñte, ýezi nâirika vohunîsh aiwi-vaênât ýat hê ashta xshafna sacåñte airime gâtûm hê nishhidhaêta vîspem â ahmât ýat hê nava xshafna sacåñte.
11
ýezi nâirika vohunîsh aiwi-vaênât ýat hê nava xshafna sacåñte âat hê paityârem ava-bareñti daêva daêvanãm ýasnâica vahmâica, aêtadha hê aête mazdayasna pañta vîcinaêta pairi urvarâbyasca varedhâbyasca aêsmaêibyô.
12
aêtadha hê aête mazdayasna ainghå zemô thrish makhem ava-kanayen dva makha frasnâdhayen maêsmana gêush ôyum âpô xrafstrem ava-janaêta maoirîm dânô-karshem ýat vâ hama duye saite kahyâcit angrô-mainyavanãm xrafstranãm ava-janyât ýat vâ aête zaêna.
13
aêtahe ýat mazdayasnahe aêtayå nâirikayå cithravaityå daxshtavaityå vohunavaityå daxshtem uzverezyât kâ hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
14
dâtare … ýô nâirikayå cithravaityå daxshtavaityå vohunavaityå paurvô vasna shyaothna tanûm irithyât ýat hê cithra daxshtem bavaiti ýat hê daxshta cithrem bavaiti kâ hê asti citha.
15
âat mraot ahurô mazdå, paoiryâi upaêta paoiryâi nishasta thrisatem upâzananãm upâzôit aspahe ashtraya thrisatem sraoshô-caranaya, bityâi upaêta bityâi nishasta pañcâsatem upâzananãm upâzôit aspahe ashtraya pañcâsatem sraoshô-caranaya, thrityâi upaêta thrityâi nishasta haptâitîm upâzananãm upâzôit aspahe ashtraya haptâitîm sraoshô-caranaya.
16
[tûiryâi upaêta tûiryâi nishasta ýim añtare vastrem frajasât ýim añtare âhitem rânem frajasât afrangharezât pairi xshudrât kâ hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.]
17
ýô nâirikãm cithravaitîm daxshtavaitîm vohunavaitîm xshudrå avi frangherezaiti nôit vanghô ahmât shyaothnem verezyeiti ýadhôit puthrahe hvâzâtahe frâ naêzem nasûm pacât paiti ûthem barât.
18
vîspe drvañtô tanu-drujô ýô aderetô tkaêshô vîspe aderetô-tkaêshô ýô asraoshô vîspe asraoshô ýô anashavanô vîspe anashavanô ýô tanu-perethô! ashem vohû…!!

Fargard 17.

1.
peresat zarathushtrô ahurem mazdãm, ahura mazda … ashâum kem aojishta mahrka mashyâka daêvô aoshô ýazâite.
2.
âat mraot ahurô mazdå, hâu bâ ashâum zarathushtra ýô aêtahmi anghvô ýat astvaiñti varesåsca hãm-râzayeiti varesåsca pairi-brîneñti srvaêca upa-thwereseñti atha dim upa-taoshayeiñti ûnâhva dim raêshayaca.
3.
âat âhva vyarethâhva zemô daêva hãm-bavaiñti âat âhva vyarethâhva zemô xrafstra hãm-bavaiñti ýim mashyâka spish nãma aojaite ýim mashyâka ýaom ýavô-hva nizhgangheñti vastra vastrâhva.
4.
âat ýat tûm zarathushtra aêtahmi anghvô ýat astvaiñti varesåsca hãm-râzayanguha varesåsca pairi-brînanguha srvaêca upa-thweresanguha, âat tûm pascaêta apa-barôish dasa-gâim haca nerebyô ashavabyô vîsata-gâim haca âthrat thrisata-gâim haca apat pañcâsata-gâim haca baresmen frastairyât.
5.
âat athra makhem ava-kanôish dîshtîm xrûzhdisme vîtastîm varedusme paiti dim âbarôish atha imã vacô framruyå vârethrakhnîsh zarathushtra, at ah’yâi ashâ mazdå urvarå vaxshat.
6.
xshathrâi vairyâi pairi-karem pairi-kârayôish tishrô ýat vâ xshvash ýat vâ nava ahunemca vairîm frasrâvayôish tishrô ýat vâ xshvash ýat vâ nava.
7.
srvâbya makhem ava-kanôish nishtara-naêmât nmânahe avat aipi ýatha kasishtahe erezvô fratemem tbishish, paiti dim âbarôish atha imã vacô framruyå vârethrakhnîsh zarathushtra, ashâ vohû mananghâ ýâ sruyê parê magaonô.
8.
xshathrâi vairyâi pairi-karem pairi-kârayôish tishrô ýat vâ xshvash ýat vâ nava ahunemca vairîm frasrâvayôish tishrô ýat vâ xshvash ýat vâ nava.
9.
paiti tê merekha ashô-zushta imå srvå vaêdhayemi imå srvå âvaêdhayemi imåse-tê srvå merekha ashô- zushta hyâre arshtayasca karetayasca thanvareca ishavasca erezifyô-parena asanasca fradaxshanya paiti daêvô mâzanyãn.
10.
ýezi nôit paiti-vaêdhayeiñti tå srvå pascaêta bun mâzainyanãm daêvanãm arshtayasca karetayasca thanvareca ishavasca erezifyô-parena asanasca fradaxshanya paiti daêvô mâzanyãn.
11.
vîspe drvañtô tanu-drujô ýô aderetô-tkaêshô vîspe aderetô-tkaêshô ýô asraoshô vîspe asraoshô ýô anashavanô vîspe anashavanô ýô tanu-perethô! ashem vohû…!!

Fargard 18.

1.
paravô zî mashyâka uiti mraot ahurô mazdå âi ashâum zarathushtra paiti-dânem ainîm baraiti anaiwyâstô daênãm diwzhat haca âthrava sanghaite,
mâ dim mruyå âthravanem
uiti mraot ahurô mazdå
âi ashâum zarathushtra.
2.
xrafstrakhnem ainîm baraiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
3.
urvarãm ainîm baraiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
4.
ashtrãm mairîm kâshayeiti anaiwyâstô daênãm diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
5.
ýô saête haurvãm tarasca xshapanem ayazemnô asrâvayô amarô everezyô asixshô asâcayô jayâi cinvat- ushtânem diwzhat haca âthrava sanghaite, mâ dim mruyå âthravanem uiti mraot ahurô mazdå âi ashâum zarathushtra.
6.
tem dim mruyå âthravanem
uiti mraot ahurô mazdå
âi ashâum zarathushtra
ýô haurvãm tarasca xshapanem
xratûm peresât ashavanem ãzô-bûjim ravazdãm cinvat-peretûm havanghô-dãm ahu-nâsem asha-nâsem vahishta-nâsem vahishtahe anghêush!
7.
paiti mãm erezvô peresanguha
ýim dadhvånghem spênishtemca vaêdhishtemca paiti-vacishtemca parshtem
avatha tê anghat vanghô
avatha anghâi spanyå
ýezi mãm paiti-peresånghe.
8.
peresat zarathushtrô ahurem mazdãm, ahura … ashâum kâ asti ithyejå marshaonô.
9.
âat mraot ahurô mazdå, akha daêna disyât spitama zarathushtra ýô thrizaremaêm ratûm aiwyånghãm nôit aiwyâsti nôit gâthå srâvayeiti nôit âpô vanguhîsh ýazaiti.
10.
ýasca mê aêtem narem ãzô avi ava-gereptem ravôhu paiti uzbârayat nôit vanghô ahmât shyaothnem verezyeiti ýatha ýat hê pãstô-frathanghem kameredhem kerenuyât.
11.
aêvahe zî ashaokhahe akhahe anashaonô zânu- drâjå asti âfritish dvayå hizu-drâjå thrayãm naêdha-cish cathwârô hvatô zavañte.
12.
ýô aêvahe ashaokhahe akhahe anashaonô haomahe hutahe dadhâiti usefritinãm vâ myezdinãm nôit vanghô ahmât shyaothnem verezyeiti ýatha ýat hazangrô-aspãm haênãm avazôit mâzdayasnîsh avi vîsô janyât nerêsh para gãm azôit varetãm!
13.
paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
14.
peresat zarathushtrô ahurem mazdãm, ahura mazda mainyô spênishta dâtare gaêthanãm astvaitinãm ashâum kô asti sraoshahe ashyehe taxmahe tanumãthrahe darshi-draosh âhûiryehe sraoshâvarezô.
15.
âat mraot ahurô mazdå, merekhô ýô parô-darsh nãma spitama zarathushtra ýim mashyâka avi duzhvacanghô kahrkatâs nãma aojaite âat hô merekhô vâcim baraiti upa ushånghem ýãm sûrãm,
16.
usehishtata mashyâka staota ashem ýat vahishtem nîsta daêva aêsha vô dvaraiti bûshyãsta darekhô-gava hâ vîspem ahûm astvañtem hakat raocanghãm frakhrâtô nihvabdayeiti, hvafsa darekhô mashyâka nôit tê sacaite.
17.
mâ thrayãm vahishtanãm aiwithyô buyata humataheca mananghô hûxtaheca vacanghô hvarshtaheca shyaothnahe thrayãm acishtanãm aiwithyô buyata dushmataheca mananghô duzhûxtaheca vacanghô duzhvarshtaheca shyaothnahe.
18.
âat mê paoiryâi thrishvâi xshafne âtarsh ahurahe mazdå nmânahe nmânô-paitîm ýâsaiti,
19.
avainghe nmânahe nmânô-paite usehishta aiwi vastra ýånghayanguha frâ zasta snayanguha â aêsmã ýâsanguha avi mãm bara paiti mãm raocaya aêsmanãm ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
20.
âat mê bityâi thrishvâi xshafne âtarsh ahurahe mazdå vâstrîm fshuyañtem ýâsaiti,
21.
avainghe fshuya vâstrya usehishta aiwi vastra ýånghayanguha frâ zasta snayanguha â aêsmã ýâsanguha avi mãm bara paiti mãm raocaya aêsmanãm ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
22.
âat mê thrityâi thrishvâi xshafne âtarsh ahurahe mazdå sraoshem ashîm ýâsaiti, avainghe âi sraosha ashya huraodha âat mãm kemcit anghêush astvatô aêsmanãm paiti baraiti ýaozhdâtanãm frasnâtaêibya zastaêibya ava mê âzish daêvô-dâtô parôit pairithnem anghvãm ava-derenãn sadayeiti.
23.
âat hô sraoshô ashyô aom merekhem frakhrârayeiti parô-darsh nãma spitama zarathushtra ýim mashyâka avi duzhvacanghô kahrkatâs nãma aojaite, âat hô merekhô vâcim baraiti upa ushånghem ýãm sûrãm,
24.
usehishtata mashyâka staota ashem ýat vahishtem nîsta daêva aêsha vô dvaraiti bûshyãsta darekhô-gava hâ vîspem ahûm astvañtem hakat raocanghãm frakhrâtô nihvabdayeiti, hvafsa darekhô mashyâka nôit tê sacaite.
25.
mâ thrayãm vahishtanãm aiwithyô buyata humataheca mananghô hûxtaheca vacanghô hvarshtaheca shyaothnahe thrayãm acishtanãm aiwithyô buyata dushmataheca mananghô duzhûxtaheca vacanghô duzhvarshtaheca shyaothnahe.
26.
âat aoshete haxa hasha ana barezish sayamnanãm, usehishta-tû vyârayeite mãm ýatârô paurvô usehishtaiti parâiti vahishtahe anghêush ýatârô paurvô âthre ahurahe mazdå aêsmanãm paiti-baraiti ýaozhdâtanãm frasnâtaêibya zastaêibya ahmâi âtarsh âfrînât xshnûtô adhbishtô hakhdhanghum,
27.
upa thwâ haxshôit gêush vãthwa
upa vîranãm pouru-tâs
upa thwâ verezvatca manô
verezvatica haxshôit anguha
urvâxsh-anguha gaya jikhaêsha
tå xshapanô ýå jvâhi,
imat âthrô âfrivanem
ýô ahmâi aêsmem baraiti
hikûsh raocas-pairîshtem
ashahe bereja ýaozhdâtã.
28.
ýasca mê aête merekha spitama zarathushtra mithwana strica nairyasca naire ashaone ashaya vanghuya para-dathat nmânem hô manyaêta para-dathô satô-stûnem hazangrô-frasciñbanem baêvare-mishtem baêvare-vaêdhayanem.
29.
ýasca mê aêtahe merekhahe ýat parô- darshahe tanumazô gêush dathat nôit dim ýava azem ýô ahurô mazdå bitîm vâcim paiti-peresemnô bva frasha frayâi vahishtem â ahûm â!
30.
sraoshô ashyô drujim aperesat
apayûxtât paiti vazrât,
druxsh ahvâthre everezike tûm zî aêva vîspahe anghêush astvatô anaiwyâstish hunahi.
31.
âat hê hâ paiti-davata ýâ daêvi druxsh, sraosha ashya huraodha nava azem vîspahe anghêush astvatô anaiwyâstish hunâmi heñti bâdha mâvayacit cathwârô arshâna.
32.
tê mãm avatha vereneñte
ýatha anyåscit arshânô
avi xshudrå xshathrishva hãm-verenavaiñti.
33.
sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm paoiryô.
34.
âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm paoiryô ýat nâ kasvikãmcina ýånghuyanãm avaretanãm naire ashaone jasta ashaya vanghuya nôit dadhâiti.
35.
hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
36.
sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
37.
âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ kasvikãmcit ýånghuyanãm avaretanãm naire ashaone ajasta ashaya vanghuya dadhâiti.
38.
hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
39.
sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm bityô.
40.
âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm bityô ýat nâ paurva frabda frabdô-drâjô framaêzaiti.
41.
hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
42.
sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
43.
âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ pasca ýat usehishtât thrigâim thrish ashem upa-stuyât bish humatanãm thrish huxshathrôtemâi cathwârô adhât ahunem vairîm frasrâvayôit ýenghe hâtãm frâyazâite.
44.
hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
45.
sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm thrityô.
46.
âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm thrityô ýat nâ hvaptô xshudrå frâraodhayeite.
47.
hô mãm avatha verenûiti ýatha anyåscit arshânô avi xshudrå xshathrishva hãm-verenavaiñti.
48.
sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
49.
âat hê hâ paiti-davata ýâ daêvi druxsh, sraosha ashya huraodha aom ainghe asti uzvarezem ýat nâ pasca ýat hvafnâdha frabûidhyamnô thrish ashem upa-stuyât bish humatanãm thrish huxshathrôtemâi cathwârô adhât ahunem vairîm frasrâvayôit ýenghe hâtãm frâyazâite.
50.
hô mãm avatha verenãn nijaiñti ýatha vehrkô cathware-zañgrô barethryât haca puthrem nizhdare-dairyât.
51.
âat aoshete speñtayâi ârmatêe, speñta ârmaite imem tê narem nisrinaomi imem mê narem nisrârayå upa sûrãm frashô-keretîm vîdush-gâthem vîdush-ýasnem paiti-parshtô-sravanghem mãzdrem hadha-hunarem tanu- mãthrem.
52.
âat hê nãma fradaithyå âtre- dâtem vâ âtre-cithrem vâ âtre-zañtûm vâ âtre-dah’yûm vâ kãmcit vâ âtre-dâtahe nãma.
53.
sraoshô ashyô drujim aperesat apayûxtât paiti vazrât, druxsh ahvâthre everezike kô tê aêtaêshãm arshnãm tûiryô.
54.
âat hê hâ paiti-davata ýâ daêvi druxsh, sraosha ashya huraodha hô bâ mê aêtaêshãm arshnãm tûiryô ýat nâ jahika pasca pañcadasîm saredhem frapataiti anaiwyâsta vâ anabdâtô vâ.
55.
pasca tûirîm gâmô-beretîm ishare pascaêta vaêm ýôi daêva hakat vaêm ava-mivâmahi hizvasca pivasca, [xshayamna pascaêta merekheñte gaêthå astvaitîsh ashahe ýatha zañda ýâtumeñta mereñcîta gaêthå ashahe.]
56.
sraoshô ashyô drujim aperesat apayûxtât paiti vazrât, druxsh ahvâthre everezike cish ainghe asti uzvarezem.
57.
âat hê hâ paiti-davata ýâ daêvi druxsh, sraosha ashya huraodha naêcish ainghe asti urvarezem
58.
ýat nâ jahika pasca pañcadasîm saredhem frapataiti anaiwyâsta vâ anabdâtô vâ.
59.
pasca tûirîm gâmô-beretîm ishare pascaêta vaêm ýôi daêva hakat vaêm ava-mivâmahi hizvasca pivasca, [xshayamna pascaêta merekheñte gaêthå astvaitîsh ashahe ýatha zañda ýâtumeñta mereñcîta gaêthå ashahe!]
60.
paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
61.
peresat zarathushtrô … ashâum kô thwãm ýim ahurem mazdãm mazishtayanti inaoiti kô mazishta tbaêshangha tbaêshayeiti.
62.
âat mraot ahurô mazdå, jahi bâ ashâum zarathushtra ýô xshudrå hãm-raêthwayeiti dahmanãm adahmanãmca daêvayasnanãm adaêvayasnanãmca tanu-perethanãm atanu-perethanãmca.
63.
thrishum apãm thraotô-stâcãm taxmanãm pairishtayeiti paiti-dîti zarathushtra thrishum urvaranãm uzuxshyeñtinãm srîranãm zairi-gaonanãm vaxshå apayasaite paiti-dîti zarathushtra.
64.
thrishum speñtayå ârmatôish varenå apayasaite paiti-dîti zarathushtra thrishum narsh ashaonô frâyô-humatahe frâyô-hûxtahe frâyô-hvarshtahe amaheca verethrakhnaheca ashavastaheca apayasaite paiti-pasti zarathushtra.
65.
tåsca tê mraomi spitama zarathushtra jãthwô-tara ýatha azhayô xshvaêwånghô ýatha vâ vehrkånghô sravanghavô ýatha vâ vehrkãm azrô-daidhîm gaêthãm avi frapataiti ýatha vâ vazakhãm hazangrô-hunãm âpem avi frapataiti!
66.
paiti mãm erezvô peresanguha ýim dadhvånghem spênishtemca vaêdhishtemca paiti-vacishtemca parshtem avatha tê anghat vanghô avatha anghâi spanyå ýezi mãm paiti-peresånghe.
67.
peresat zarathushtrô … ashâum ýô nâirikãm cithravaitîm daxshtavaitîm vohunavaitîm baodhô vîdhvå cikithwå baodhanguhaitîm vîthushîm avi-cicithushîm xshudrå avi frangharezaiti
68.
kat ainghe asti paititish kat ainghe asti âperetish kat aêtahe paiti varshta shyaothna cicithwå azaêta.
69.
âat mraot ahurô mazdå, ýô nâirikãm cithravaitîm daxshtavaitîm vohunavaitîm baodhô vîdhvå cikithwå baodhanguhaitîm vîthushîm avi-cicithushîm xshudrå avi frangharezaiti
70.
hazangrem anumayanãm frâvinuyât vîspanãmca aêtaêshãm pasvãm asmanivå zaothra âthre ashaya vanghuya frabarôit bâzva aiwyô vanguhibyô frabarôit.
71.
hazangrem vazyanãm aêsmanãm xraozhdvanãm hushatãm pairîshtanãm âthre ashaya vanghuya frabarôit hazangrem vazyanãm aêsmanãm varedvanãm urvâsnayå vâ vohu-gaonahe vâ vohu-keretôish vâ hadhânaêpatayå vâ kãmcit vâ hubaoidhitemanãm urvaranãm âthre ashaya vanghuya frabarôit,
72.
hazangrem frasteretanãm baresmaine frastairyât hazangrem zaothranãm haomavaitinãm gaomavaitinãm ýaozhdâtanãm pairiangharshtanãm dahmô-ýaozhdâtanãm dahmô-pairiangharshtanãm hãm-irista aêtayå urvarayå ýâ vaoce hadhânaêpâta aiwyô vanguhibyô ashaya vanghuya frabarôit,
73.
hazangrem azhinãm udarô-thrãsanãm ava-janyât duye hazangre anyaêshãmcit hazangrem vazakhanãm dâdhmainyanãm ava-janyât duye hazangre upâpanãm hazangrem maoirinãm dânô-karshanãm ava-janyât duye hazangre anyaêshãmcit,
74.
thrisatem frascimbananãm frasciñbayôit tarasca âpô nâvayå hazangrem upâzananãm upâzôit aspahe ashtraya duye hazangre sraoshô-caranaya.
75.
tat ainghe asti paititish tat ainghe asti âperetish tat aêtahe paiti varshta shyaothna cicithwå azaêta.
76.
ýezi azâite tem ahûm paithyâite ýim ashaonãm ýezi nôit azâite tem ahûm paithyâite ýim drvatãm temanghaênem temascithrem temanghem! ashem vohû…!!

Vendidad: Fargard 19.

1
apâxtarat haca naêmât apâxtaraêibyô haca naêmaêibyô fradvarat angrô mainyush pouru-mahrkô daêvanãm daêvô, uiti davata hô ýô duzhdå angrô mainyush pouru- mahrkô, druxsh upa-dvâra mereñcanguha ashâum zarathushtra, druxsh hê pairi-dvarat bûiti daêvô ithyejô marshaonem davazhå.
2
zarathushtrô ahunem vairîm frasrâvayat, ýathâ ahû vairyô … vâstârem, âpô vanguhîsh frâyazaêta vanghuyå dâityayå daênãm mâzdayasnîm fraorenaêta, druxsh hê steretô apa dvarat bûiti daêvô ithyejô marshaonem davazhå.
3
druxsh hê paiti-davata, skutara angra mainyô nôit hê aoshô pairi- vaênâmi spitamâi zarathushtrâi pouru-hvarenanghô ashava zarathushtrô, zarathushtrô mananghô pairi-vaênât, daêva mê drvañtô duzhdånghô aoshem hãm-pereseñte.
4
usehishtat zarathushtrô frashûsat zarathushtrô asaretô aka manangha xrûzhdya tbaêshô-parshtanãm asânô zasta drazhimnô katô-masanghô heñti ashava zarathushtrô viñdemnô dathushô ahurâi mazdâi, kva hê drazhahe ainghå zemô ýat pathanayå skarenayå dûraêpârayå drejya paiti zbarahi nmânahe pourushaspahe.
5
uzvaêdhayat zarathushtrô angrem mainyûm, duzhda angra mainyô janâni dãma daêvô- dâtem janâni nasush daêvô-dâtem janâni pairikãm ýãm xnãthaiti ýahmâi us-zayâite saoshyãs verethraja haca apat kãsaoyât ushastarat haca naêmât ushastaraêibyô haca naêmaêibyô.
6
paiti ahmâi adavata duzhdâmô angrô mainyush, mâ mê dãma mereñcanguha ashâum zarathushtra, tûm ahi pourushaspahe puthrô barethryât haca zâvishi apa-stavanguha vanguhîm daênãm mâzdayasnîm viñdâi ýânem ýatha viñdat vadhakhanô dainghupaitish.
7
paiti ahmâi avashata ýô spitâmô zarathushtrô, nôit hê apa-stavâne vanguhîm daênãm mâzdayasnîm nôit astaca nôit ushtânemca nôit baodhasca vîurvîsyât.
8
paiti ahmâi adavata duzhdâmô angrô mainyush, kahe vaca vanâi kahe vaca apa-ýasâi kana zaya hukeretånghô mana dãma angrô-mainyush.
9
paiti ahmâi avashata ýô spitâmô zarathushtrô, hâvanaca tashtaca haomaca vaca mazdô-fraoxta mana zaya asti vahishtem ana vaca vanâni ana vaca apa-ýasâne ana zaya hukeretånghô âi duzhda angra mainyô, dathat speñtô mainyush dathat zrûne akarane fradathen ameshå speñta huxshathra hudhånghô.
10
zarathushtrô ahunem vairîm frasrâvayat, ýathâ ahû vairyô … vâstârem, frâmraot ashava zarathushtrô, tat thwâ peresâ arsh mê vaoca ahura.
11
peresat zarathushtrô … ashâum drejya paiti zbarahe ahurâi mazdâi vanghave vohu-maite ånghânô ashâi vahishtâi xshathrâi vairyâi speñtayâi ârmatêe.
12
kutha hîsh azem kerenavâni haca avanghât drujat haca duzhda angra mainyô kutha hãm-raêthwem kutha paiti-raêthwem kutha nasush apayasâne haca avanghât vîsat ýat mâzdayasnôit kutha narem ashavanem ýaozhdathâni kutha nâirikãm ashaonîm ýaozhdâthrem barâni.
13
âat mraot ahurô mazdå, nizbayanguha tû zarathushtra vanguhîm daênãm mâzdayasnîm nizbayanguha tû zarathushtra avaên ameshå speñta avi haptô- karshvairîm zãm nizbayanguha tû zarathushtra thwâshahe hvadhâtahe zrvânahe akaranahe vayaosh uparô-kairyehe nizbayanguha tû zarathushtra vâtô taxmô mazdadhâtô speñta srîra dukhdha ahurahe mazdå,
14
nizbayanguha tû zarathushtra fravashish mana ýat ahurahe mazdå avãm ýãm mazishtãmca vahishtãmca sraêshtãmca xraozhdishtãmca xrathwishtãmca hukereptemãmca ashât apanôtemãmca ýenghe urva mãthrô speñtô, hvatô nizbayanguha zarathushtra imat dãma ýat ahurahe mazdå.
15
vaxshem mê asãsat zarathushtrô, nizbayemi ahurô mazdå ashava dãma dâtem nizbayemi mithrem vouru-gaoyaoitîm huzaênem hvarenanguhastemem zayanãm verethravastemem zayanãm nizbayemi sraoshem ashîm huraodhem snaithish zastaya drazhimnô kameredhe paiti daêvanãm.
16
nizbayemi mãthrô speñtô ýô ash-hvarenå nizbayemi thwâshahe hvadhâtahe zrvânahe akaranahe vayaosh uparô-kairyehe nizbayemi vâtô taxmô mazdadhâtô speñta srîra dukhdha ahurahe mazdå nizbayemi vanguhîm daênãm mâzdayasnîm dâtem vîdôyûm zarathushtra!
17
peresat zarathushtrô ahurem mazdãm, dâtô vanghen ahura mazda kana ýasna ýazâne kana ýasna frâyazâne imat dãma ýat ahurahe mazdå.
18
âat mraot ahurô mazdå, urvaranãm uruthmyanãm ava-jasâhi spitama zarathushtra srîra urusta amavaiti imat vacô framrû, nemô urvaire vanguhi mazdadhâte ashaone ashem vohû vahishtem astî…(1).
19
baresma hê uzbârayat aêshô-drâjô ýavô-frathô mâ hê baresma pairi-keretem pairi-kereñtîsh narô anghen ashavanô hâvôya zasta nyâsemnô ýazemnô ahurem mazdãm ýazemnô ameshê speñtê haomasca zâirish berezô srîråsca vohu manô râtaca vanguhi mazdadhâta ashaone vahishtô.
20
peresat zarathushtrô ahurem mazdãm, vîspô-vîdhvå ahura mazda ahvafnô ahi abanghô tûm ýô ahurô mazdå, vohu manô hãm-raêthwayeiti vohu manô paiti- raêthwayeiti haca avanghât tanvat ýat daêvô-jatayå daêva hãm-raêthwayeiti bvat vohu manô ýaozhdâtô.
21
âat mraot ahurô mazdå, gaomaêzem ayasôit zarathushtra gaom pairi uxshânem bixedhrem dâityô-keretem ýaozhdâta frabarôish zãm paiti ahuradhâtãm pairi-karshem pairi-karshôit aêshô nâ ýô ýaozhdâthryô.
22
satem ashô-stûitinãm upastvôish bizhvat ahunem vairîm frasrâvayôish, catura frasnana frasnayôit gaomaêzem gava dâtayå bish âpem mazdadhâtayå.
23
ýaozhdâta bun vohu manô ýaozhdâta bun mashyô uzgeurvayât vohu manô hâvôya bâzvô dashinaca dashina bâzvô hâvayaca, âat vohu manô nidaidhîsh sûrô-thwarshtanãm raocanghãm ýat hê stârãm bakhô-dâtanãm aiwi raocayåñte vîspem â ahmât ýat hê nava xshafna sacåñte.
24
âat pasca nava-xshaparât âthre zaothrå frabarôish xrûzhdranãm aêsmanãm âthre frabarôish vohu-gaonanãm baoidhinãm âthre frabarôish vohu manô â-baodhayaêta.
25
ýaozhdâta bun vohu manô ýaozhdâta bun mashyô uzgeurvayât vohu manô hâvôya bâzvô dashinaca dashina bâzvô haoyaca fravaocat vohu manô, nemô ahurâi mazdâi nemô ameshaêibyô speñtaêibyô nemô anyaêshãm ashaonãm!
26
peresat zarathushtrô ahurem mazdãm, vîspô-vîdhvå ahura mazda haxshâne narem ashavanem haxshâne nâirikãm ashaonîm haxshâne drvatãm daêvayasnanãm merezujîtîm mashyânãm zãm ahuradhâtãm nipârayañta âpem taciñtãm ýavanãm uruthmãm anyãm hê avaretãm nipârayañta, âat mraot ahurô mazdå, haxshaêsha ashâum zarathushtra.
27
dâtare … dva tâ dâthra bavaiñti dva tâ dâthra pârayeiñti dva tâ dâthra pairi-bavaiñti dva tâ dâthra paiti hañjaseñti mashyô astvaiñti anghvô havâi urune para-daidhyât.
28
âat mraot ahurô mazdå, pasca para-iristahe mashyehe pasca frasaxtahe mashyehe pasca pairithnem dereniñti daêva drvañtô duzhdånghô, thrityå xshapô vîusaiti ushi raocaiti bâmya gairinãm ashahvâthranãm âsenaoiti mithrem huzaênem hvarexshaêtem uzyôraiti,
29
vîzareshô daêvô nãma spitama zarathushtra urvânem bastem vâdhayeiti drvatãm daêvayasnanãm merezujîtîm mashyânãm, pathãm zrvô-dâtanãm jasaiti ýasca drvaite ýasca ashaone cinvat-peretûm mazdadhâtãm baodhasca urvânemca ýâtem gaêthanãm paiti-jaidhyeiñti dâtem astvaiñti anghvô.
30
hâu srîra kereta taxma huraodha jasaiti spânavaiti nivavaiti pasvaiti ýaoxshtavaiti hunaravaiti, [hâ drvatãm akhem urvânô temô-hva nizarshaite,] hâ ashâunãm urvânô tarasca harãm berezaitîm âsenaoiti tarô cinvatô peretûm vîdhârayeiti haêtô mainyavanãm ýazatanãm.
31
usehishtat vohu manô haca gâtvô zaranyô- keretô fravaocat vohu manô, kadha-nô idha ashâum agatô ithyejanghatat haca anghaot aithyajanghem ahûm â.
32
xshnûtô ashaonãm urvânô pârayeiñti avi ahurahe mazdå avi ameshanãm speñtanãm avi gâtvô zaranyô- keretô avi garô nmânem maêthanem ahurahe mazdå maêthanem ameshanãm speñtanãm maêthanem anyaêshãm ashaonãm.
33
ýaozhdâthryô ashava pasca para-iristîm daêva drvañtô duzhdånghô baodhem avatha fratereseñti ýatha maêshi vehrkavaiti vehrkat haca frataresaiti.
34
narô ashavanô hãm-bavaiñti nairyô sanghô hãm-bavaiti ashtô mazdå ahurahe mrûidhi nairyô sanghô, hvatô nizbayanguha zarathushtra imat dãma ýat ahurahe mazdå.
35
vaxshem mê asãsat zarathushtrô, nizbayemi ahurô mazdå ashava dâmi-dâtem nizbayemi zãm ahuradhâtãm âpem mazdadhâtãm urvarãm ashaonîm nizbayemi zrayô vourukashem nizbayemi asmanem hvanvañtem nizbayemi anakhra raocå hvadhâtå.
36
nizbayemi vahishtem ahûm ashaonãm raocanghem vîspô-hvâthrem nizbayemi garô nmânem maêthanem ahurahe mazdå maêthanem ameshanãm speñtanãm maêthanem anyaêshãm ashaonãm nizbayemi misvânahe gâtvahe hvadhâtahe cinvat-peretûm mazdadhâtãm.
37
nizbayemi saokãm vanguhîm vouru-dôithrãm nizbayemi ukhrå ashâunãm fravashayô vîspå dâmãn savanguhaitish nizbayemi verethrakhnem ahuradhâtem barô-hvarenô mazdadhâtem nizbayemi tishtrîm stârem raêvañtem hvarenanguhañtem gêush kehrpa zaranyô-sravahe.
38
nizbayemi gâthâbyô speñtâbyô ratuxshathrâbyô ashaonibyô nizbayemi ahunavaityå gâthayå nizbayemi ushtavaityå gâthayå nizbayemi speñtâ-mainyêush gâthayå nizbayemi vohuxshathrayå gâthayå nizbayemi vahishtôishtôish gâthayå.
39
nizbayemi avat karshvare ýat arezahe savahe nizbayemi avat karshvare ýat fradadhafshu vîdadhafshu nizbayemi avat karshvare ýat vouru-bareshti vouru-jareshti nizbayemi imat karshvare ýat hvanirathem bâmîm nizbayemi haêtumeñtem raêvañtem hvarenanguhañtem nizbayemi ashôish vanghuyå [cistôish vanghuyå] nizbayemi razishtayå cistayå nizbayemi hvarenô airyanãm dah’yunãm nizbayemi hvarenô ýimâi xshaêtâi hvãthwâi.
40
ýashtô xshnûtô frithô paiti- zañtô sraoshô ashyô huraodhô verethraja sraoshô ashyô, âthre zaothrå frabarôish xrûzhdranãm aêsmanãm âthre frabarôish vohu-gaonanãm baoidhinãm âthre frabarôish âtrem vâzishtem frâyazaêsha daêum janem speñjakhrîm, hvâsta hvarethå frabarôish perenãm vikhzhârayeiñtîm.
41
sraoshô ashyô frâyazaêsha, sraoshô ashyô daêum kuñdem banghem vîbanghem ava-janyât drujaskanãm hãm-pataiti drvatãm daêvayasnanãm merezujîtîm mashyânãm [nazdishtå dainghâvô ýaozhdâthryât haca frakaire frakerenaot vâstre verezyôit pasush-hvarethem gave hvarethem].
42
nizbayemi karô masyô upâpô bûne jafranãm vairyanãm nizbayemi merezu pourvô-hvadhâtô ýûidhishtô mainivå dâmãn nizbayemi hapta sravô bâmya hvånghô puthrånghô pusånghô bavaiñti.
43
fradavata vîdavata
framanyata vîmanyata
angrô mainyush pouru-mahrkô daêvanãm daêvô iñdrô daêvô saoru daêvô nånghaithem daêvô taurvi zairica aêshemem xrvî-drûm akatashem daêum zyãm daêvô-dâtem ithyejô marshaonem zaurva duzhdãfedhrô kerenaoiti, bûiti daêvô driwish daêvô daiwish daêvô kasvîsh daêvô paitishô daêvô daêvanãm daêvôtemô.
44
daêvô uiti davata hô ýô duzhdå angrô mainyush pouru-mahrkô, cim hãm-beretha hãm-bârayama daêva drvañtô duzhdånghô arezûrahe paiti kameredhem.
45
advareñta adâuñta
daêva drvañtô duzhdånghô
urutheñta adâuñta
daêva drvañtô duzhdånghô
akhãm daothrîm dâuñta
daêva drvañtô duzhdånghô, imem nô hãm-beretha hãm-bârayama arezûrahe paiti kameredhem.
46
zâtô bê ýô ashava zarathushtrô nmânahe pourushaspahe kva hê aoshô viñdâma hâu daêvanãm snathô hâu daêvanãm paityârô hâu druxsh vîdruxsh, nyåñcô daêvayâzô nasush daêvô-dâtô draogô mithaoxtô.
47
adâuñta advareñta daêva drvañtô duzhdånghô bûnem anghêush temanghahe ýat erekhatô daozhanguhahe!
ashem vohû…!!

Fargard 20.

1
peresat zarathushtrô … ashâum kô paoiryô mashyânãm thamnanguhatãm varecanguhatãm ýaoxshtivatãm ýâtumatãm raêvatãm taxmanãm paradhâtãm ýaskem ýaskâi dârayat mahrkem mahrkâi dârayat vazemnô-arshti dârayat âthrô tafnush dârayat tanaot haca mashyehe.
2
âat mraot ahurô mazdå, thritô paoiryô spitama zarathushtra mashyânãm thamnanguhatãm varecanguhatãm ýaoxshtivatãm ýâtumatãm raêvatãm taxmanãm paradhâtãm ýaskem ýaskâi dârayat mahrkem mahrkâi dârayat vazemnô-arshti dârayat âthrô tafnush dârayat tanaot haca mashyehe.
3
vishcithrem dim ayasata
âyapta xshathra vairya paitishtâtêe ýaskahe paitishtâtêe mahrkahe paitishtâtêe dâzhu paitishtâtêe tafnu paitishtâtêe sâranahe paitishtâtêe sârastyehe paitishtâtêe azhanahe paitishtâtêe azhahvahe paitishtâtêe kurukhahe paitishtâtêe azhivâkahe paitishtâtêe drukahe paitishtâtêe astairyehe paitishtâtêe akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
4
adha azem ýô ahurô mazdå urvarå baêshazyå uzbarem paoirîsh pouru-satå paoirîsh pouru-hazangrå paoirîsh pouru- baêvanô ôyum gaokerenem pairi.
5
tat vîspem frînâmahi tat vîspem fraêshyâmahi tat vîspem nemah’yâmahi avi imãm tanûm ýãm mashyânãm
6
paitishtâtêe ýaskahe paitishtâtêe mahrkahe paitishtâtêe dâzhu paitishtâtêe tafnu paitishtâtêe sâranahe paitishtâtêe sârastyehe paitishtâtêe azhanahe paitishtâtêe azhahvahe paitishtâtêe kurukhahe paitishtâtêe azhivâkahe paitishtâtêe drukahe paitishtâtêe astairyehe paitishtâtêe akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
7
ýaskem thwãm paiti-sanghâmi mahrkem thwãm paiti-sanghâmi dâzhu thwãm paiti-sanghâmi tafnu thwãm paiti-sanghâmi sâranahe thwãm paiti-sanghâmi sârastyehe thwãm paiti-sanghâmi azhanahe thwãm paiti-sanghâmi azhahvahe thwãm paiti-sanghâmi kurukhahe thwãm paiti-sanghâmi azhivâkahe thwãm paiti-sanghâmi drukahe thwãm paiti-sanghâmi astairyehe thwãm paiti-sanghâmi akhashe thwãm paiti-sanghâmi.
8
ýenghe vareda vanaêma drujim druje vareda vanaêma ýenghe xshathrem aojonghvat maibyô ahura.
9
paiti-perene ashire paiti-perene akhûire paiti-perene akhrãm paiti-perene ukhrãm paiti-perene ýaskahe paiti-perene mahrkahe paiti-perene dâzhu paiti-perene tafnu paiti-perene sâranahe paiti-perene sârastyehe paiti-perene azhanahe paiti-perene azhahvahe paiti-perene kurukhahe paiti-perene azhivâkahe paiti-perene drukahe paiti-perene astairyehe paiti-perene akhashyå pûityå âhityå ýâ angrô mainyush frâkereñtat avi imãm tanûm ýãm mashyânãm.
10
paiti-perene vîspem ýaskemca mahrkemca vîspe ýâtavô pairikåsca vîspå janyô ýå drvaitîsh.
11
â airyêmâ ishyô rafedhrâi jañtû nerebyascâ nâiribyascâ zarathushtrahe vanghêush rafedhrâi mananghô ýâ daênâ vairîm hanât mîzhdem ashahyâ ýâsâ ashîm ýãm ishyãm ahurô masatâ mazdå.
12
jañtu â-airyêmâ-ishyô vîspem ýaskemca mahrkemca vîspe ýâtavô pairikåsca vîspå janyô ýå drvaitîsh.
13-14
ýathâ ahû vairyô … mâmereñcainîsh gaêthå astvaitîsh ashahe! ashem vohû…!!

Fargard 21.

1
nemase-tê gaospeñta nemase-tê gaosh hudå nemase-tê frâdheñte nemase-tê varedheñte nemase-tê dâthrô baxtem vahishtâi ashaone anazãthâi ashaone ýâ jahi mereñcaite ashemaokhô anashava mashyasca drvå sâsta.
2
ýayata dunma ýayata frâ-âpem nyâpem upa-âpem hazangrô-vârayô baêvare-vârascit mruyå ashâum zarathushtra, ýaskahe apanashtahe mahrkahe apanashtahe jaini-ýaskahe apanashtahe jaini-mahrkahe apanashtahe gadhahe apa-gadhahe apanashtahe.
3
ýezi uzîrô-hva mereñcaite arezahva bishazyât ýezi arezahva mereñcaite xshapô-hva bishazyât ýezi xshapô- hva mereñcaite ushahva bishazyât vî-vâreñti vî-vârâhu nava âfsh nava zå nava urvarå nava baêshazå navata baêshaza-kesha.
4
ýatha zrayô vouru-kashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca ýaonem dadhât ahurô mazdå!
5
uzayara uzîra hvarexshaêta aurvat-aspa tarasca harãm berezaitîm raoxshnem kerenavâhi dâmahva temcit uzîra
ýezi ahi garô deretem
mazdadhâtem paiti pañtãm
bakhô-baxtem paiti ýaonem
frathwarshtem paiti âfeñtem.
6
[âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
7
kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
8
ýatha zrayô … ýehe zãthaêca vaxshaêca zãm dadhât ahurô mazdå!
9
uzayara uzîra mångha gaocithra tarasca harãm berezaitîm raoxshnem kerenavâhi dâmahva temcit uzîra ýezi ahi garô deretem mazdadhâtem paiti pañtãm bakhô-baxtem paiti ýaonem frathwarshtem paiti âfeñtem.
10
[âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ-tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
11
kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
12
ýatha zrayô vourukashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca vaxshem dadhât ahurô mazdå.
13
uzayara uzîra stâra gufra afshcithrånghô tarasca harãm berezaitîm raoxshnem kerenavâhi dâmahva temcit uzîra ýezi ahi garô deretem mazdadhâtem paiti pañtãm bakhô-baxtem paiti ýaonem frathwarshtem paiti âfeñtem.
14
[âat ana parô dush-kereta] âat ana parô mãthrô speñtô, frâ-tê zãthemca vaxshathemca azem idha frasnayeni frâ-tê kehrpemca tevîshîmca ýaozhdathâni kerenaomi thwãm hacat-puthrãm hacat-paêmanyãm.
15
kâravaiti paêmavaiti xshviptavaiti raokhnavaiti mazgavaiti frazaiñtivaiti frâ-tê hazangrem xãm azem idha frasnayeni gaodhanem avi hañtacinå ýat asti puthrahe thrimô.
16
ýatha zrayô vourukashem apô asti hañjakhmanem usihishta hãm-ýaêtånghô ýaonemca avi zãmca zãmca avi ýaonemca usihishta pâiri-haêzanguha ýehe zãthaêca vaxshaêca uzayarem dadhât ahurô mazdå!
17
uzayara uzîra paxrushta hî kaxuzhi paxrushta hî ayehye paxrushta hî ýâtumaiti jahi.
18-23
paiti-perene ashire … astvaitîsh ashahe!
ashem vohû…!!

Fargard 22.

1
mraot ahurô mazdå spitamâi zarathushtrâi,
azem ýô ahurô mazdå
azem ýô dâta vanghvãm
ýase-tat nmânem âkerenem srîrem raoxshnem frâderesrem
uzayeni pârayeni.
2
âat mãm mairyô âkasat
âat mãm mairyô frâkerenaot
angrô mainyush pouru-mahrkô navaca ýaskê navaitishca navaca sata navaca hazangra navasêsca baêvãn âat mãm tûm bishazyôish mãthrô speñtô ýô ash-hvarenå.
3
dathâni tê aêtahe paiti hakat hazangrem aspanãm aurvatô derezi-takanãm ýazâi saoka vanguhi mazdadhâta ashaoni, dathâni tê aêtahe paiti hakat hazangrem ushtranãm urvatô saêni-kaofanãm ýazâi saoka vanguhi mazdadhâta ashaoni.
4
dathâni tê aêtahe paiti hakat hazangrem gavãm axshaênanãm aperetô-tanunãm ýazâi saoka vanguhi mazdadhâta ashaoni, dathâni tê aêtahe paiti hakat hazangrem anumayanãm haretô vîspô-gaonanãm ýazâi saoka vanguhi mazdadhâta ashaoni.
5
uta tê azem âfrînâni srîra dahma âfriti fritha dahma âfriti
ýâ ûnem perenem kerenaoiti
perenemcit vîkhzhârayeiti
avañtemcit bañdayeiti
bañtemca drûm kerenaoiti.
6
paiti ahmâi avashata
mãthrô speñtô ýô ash-hvarenå, kutha tê azem bishazâni kutha tê azem apa-varâni navaca ýaskê navaitishca navaca sata navaca hazangra navasêsca baêvãn.
7
nairyô sanghô aocayata
ýô dadhvå ahurô mazdå,
nairya sangha vyâxana
para-âidhi upa-vazanguha
avi nmânem airyamaini
imat sanghôish airyamanâi,
8
imat tê sanghat ahurô mazdå ashava, azem ýô ahurô mazdå azem ýô dâta vanghvãm ýase-tat nmânem âkerenem srîrem raoxshnem frâderesrem uzayeni pârayeni,
9
âat mãm mairyô âkasat âat mãm mairyô frâkerenaot angrô mainyush pouru-mahrkô navaca ýaskê navaitishca navaca sata navaca hazangra navasêsca baêvãn âat mãm tûm bishazyôish airyama ýô ishyô.
10-12
dathâni … kerenaoiti.
13
ahe vacô paityesti
para-âidhi upa-vazata
nairyô sanghô vyâxanô
avi nmânem airyamaini
imat sanghat airyamanâi,
14-18
imat tê sanghat ahurô mazdå ashava, azem ýô ahurô mazdå … kerenaoiti.
19
moshu tat âs nôit darekhem ýat frâyatayat thwaxshemnô airyama ýô ishyô
gairîm avi speñtô-frasnå
vareshem avi speñtô-frasnå.
20
navanãm aspanãm arshnãm gaonem barat airyama ýô ishyô navanãm ushtranãm arshnãm gaonem barat airyama ýô ishyô navanãm gavãm arshnãm gaonem barat airyama ýô ishyô navanãm anumayanãm arshnãm gaonem barat airyama ýô ishyô nava vaêtayô barat nava karshå frakârayat.
21-26
paiti-perene ashire … ashahe!
ashem vohû…!!
!—!—!—!—! nâismî daêvô, aêvô pañtå ýô ashahe vîspe anyaêshãm apeñtãm!
—!——-!
——-!