Hadhokht Nask

Хадокт наск

1
peresat zarathushtrô ahurem mazdãm, ahura mazda mainyû spênishta dâtare gaêthanãm astvaitinãm ashâum, kahmi te aêvahmi paiti vacô vîspanãm vohunãm vîspanãm asha- cithranãm fravâkem.
2
paiti-shê aoxta ahurô mazdå, ashem stûtô zarathushtra.
3
ýô ashem staoiti fraoret-fraxshni avi manô zarazdâtôit anghuyat haca, hô mãm staoiti ýim ahurem mazdãm, hô âpem staoiti, hô zãm staoiti, hô gãm staoiti, hô urvarãm staoiti, hô vîspa vohû mazdadhâta asha-cithra staoiti.
4
aêshô zî vâxsh zarathushtra erezhuxdhô framrvãnô â vacô ahunô vairyô fraoxtô amaheca verethrakhnaheca urunaca daênaca spanvanti.
5
arejaiti zî spitama zarathushtra aêva ashô- stûitish ôium vâ ashaonô xshnaothrem satem h’afnanãm hazangrem gêush h’areitinãm baêvare anumayanãm kanghåscit tanunãm parô-asti jasôithyå.
6
kâ aêva ashô-stûitish ýâ dasa anyaêshãm ashô-stûitinãm masanaca vanghanaca srayanaca arejaiti.
7
paiti-shê aoxta ahurô mazdå, hâu bâ ashâum zarathushtra ýãm bâ nâ franguhareta haurvatbya ameretatbya ashem staoiti, frastavanô humataca hûxtaca hvarshtaca, nizhbaremnô dushmataca duzhûxtaca duzhvarshtaca.
8
kâ aêva ashô-stûitish ýâ satem anyaêshãm ashô-stûitinãm masanaca vanghanaca srayanaca arejaiti.
9
paiti-shê aoxta ahurô mazdå, hâu bâ ashâum zarathushtra ýãm bâ nâ pasca franguhareiti haomahe hutahe ashem staoiti, frastavanô humataca hûxtaca hvarshtaca, nizhbaremnô dushmataca duzhûxtaca duzhvarshtaca.
10
kâ aêva ashô-stûitish ýâ hazangrem anyaêshãm ashô-stûitinãm masanaca vanghanaca srayanaca arejaiti.
11
paiti-shê aoxta ahurô mazdå, hâu bâ ashâum zarathushtra ýãm bâ nâ h’afnâdha ustryamnô avanguhabdemnô ashem staoiti, frastavanô humataca hûxtaca hvarshtaca, nizhbaremnô dushmataca duzhûxtaca duzhvarshtaca.
12
kâ aêva ashô-stûitish ýâ baêvare anyaêshãm ashô-stûitinãm masanaca vanghanaca srayanaca arejaiti.
13
paiti-shê aoxta ahurô mazdå, hâu bâ ashâum zarathushtra ýãm bâ nâ h’afnâdha frakhrisemnô frabudhyamnô ashem staoiti, frastavanô humataca hûxtaca hvarshtaca, nizhbaremnô dushmataca duzhûxtaca duzhvarshtaca.
14
kâ aêva ashô-stûitish ýâ vîspem imat karshvare ýat h’anirathem mat-fshum mat-rathem paiti-vîrem masanaca vanghanaca srayanaca arejaiti.
15
paiti-shê aoxta ahurô mazdå, hâu bâ ashâum zarathushtra ýãm bâ nâ usteme urvaêse gayehe ashem staoiti, frastavanô humataca hûxtaca hvarshtaca, nizhbaremnô vîspa dushmataca duzhûxtaca duzhvarshtaca.
16
kâ aêva ashô-stûitish ýâ vîspem imat ýat añtareca zãm añtareca asmanem imãmca zãm avaca raocå vîspaca vohu mazdadhâta asha-cithra masanaca vanghanaca srayanaca arejaiti.
17
paiti-shê aoxta ahurô mazdå, hâu bâ ashâum zarathushtra ýat fraoirishaiti pairi dushmataêibyasca duzhûxtaêibyasca duzhvarshtaêibyasca!

[[2]]

1
peresat zarathushtrô ahurem mazdãm, ahura mazda mainyû spênishta dâtare gaêthanãm astvaitinãm ashâum, ýat ashava para-irithyeiti dva aêtãm xshapanem havô urva vanghaiti.
2
âat mraot ahurô mazdå, asne vakhdhanât nishhidhaiti, ushtavaitîm gâthãm srâvayô ushtatâtem nimraomnô,
ushtâ ahmâi ýahmâi ushtâ kahmâicit
vasê-xshayãs mazdå dâyât ahurô. upa aêtãm xshapanem avavat shâtôish urva ishaiti ýatha vîspem imat ýat juyô anghush.
3
ýãm bityãm kva aêtãm xshapanem havô urva vanghaiti.
4
âat mraot ahurô mazdå, asne vakhdhanât nishhidhaiti, ushtavaitîm gâthãm srâvayô ushtatâtem nimraomnô,
ushtâ ahmâi ýahmâi ushtâ kahmâicit
vasê-xshayãs mazdå dâyât ahurô. upa aêtãmcit xshapanem avavat shâtôish urva ishaiti ýatha vîspem imat ýat juyô anghush.
5
ýãm thrityãm dva aêtãmcit xshapanem havô urva vanghaiti.
6
âat mraot ahurô mazdå, asne vakhdhanât nishhidhâiti ushtavaitîm gâthãm srâvayô ushtatâtem nimraomnô.
ushtâ ahmâi ýahmâi ushtâ kahmâicit
vasê-xshayãs mazdå dâyât ahurô. upâca aêtãmcit xshapanem avavat shâtôish urva ishaiti ýatha vîspem imat ýat juyô anghush.
7
thrityå xshapô thraoshta vyusã sadhayeiti ýô narsh ashaonô urva urvarâhuca paiti baoidhishca vîdidhâremnô sadhayeiti. âdim vâtô upa- vâvô sadhayeiti rapithwitarat haca naêmât rapithwitaraêibyô haca naêmaêibyô hubaoidhish hubaoidhitarô anyaêibyô vâtaêibyô. âat tem vâtem nånghaya uzgerembyô sadhayeiti ýô narsh ashaonô urva, kudadh aêm vâtô vâiti ýim ýava vâtem nånghâbya hubaoidhitemem jigaurva.
9
anghå dim vâtayå frêrenta sadhayeiti ýâ hva daêna, kainînô kehrpa srîrayå xshôithnyå aurusha-bâzvô amayå huraodhayå huzarshtayå berezaityå eredva- fshnyå sraotanvô âzâtayå raêvascithrayå pañca-dasayå raodhaêshva kehrpa avavatô srayå ýatha dâmãn sraêshtâish.
10
âat hîm aoxta peresô ýô narsh ashaonô urva, cishca carâitish ahi ýãm it ýava carâitinãm kehrpa sraêshtãm dâdaresa.
11
âat he paiti-aoxta ýâ hva daêna, azem bâ te ahmi ýum humanô hvacô hushyaothana hudaêna ýâ hva daêna h’aêpaithe tanvô, cishca thwãm cakana ava masanaca vanghanaca srayanaca hubaoidhitaca verethrajãstaca paiti-dvaêshayañtaca ýatha ýat me sadhayehi.
12
tum mãm cakana ýum humanô hvacô hushyaothana hudaêna ava masanaca vanghanaca srayanaca hubaoidhitaca verethrajãstaca paiti-dvaêshayañtaca ýatha ýat te sadhayemi.
13
ýat tum ainim avaênôish saocayaca kerenavantem baosavasca varaxedhråsca varô-zhintem urvarô- strayãsca kerenavantem, âat tum nishhidhôish gâthåsca srâvayô apasca vanguhîsh ýazemnô âta-remca ahurahe mazdå naremca ashavanem kuxshnvãnô asnâatca [jaseñtem dûrâatca].
14
âat mãm frithãm haitîm frithôtarãm srîrãm haitîm srîrôtarãm berexdhãm haitîm berexdhôtarãm frataire gâtvô ånghanãm fratarô-taire gâtvô nishâdhayôish aêta humata aêta hûxta aêta hvarshta, âat mãm narô paskât ýazente ahurem mazdãm darekhô- ýashtemca hãm-parshtemca.
15
paoirîm gâma frabarat ýô narsh ashaonô urva humate paiti nidadhât, bitîm gâma frabarat ýô narsh ashaonô urva hûxte paiti nidadhât, xritîm gâma frabarat ýô narsh ashaonô urva hvarshte paiti nidadhât, tûirîm gâma frabarat ýô narsh ashaonô urva anakhraêshva raocôhva paiti nidadhât.
16
âdim aoxta peresô pourvô ashava para- irithyô, katha ashâum para-irithyô katha ashâum apa- jasô shitibyasca haca gaomavaitibyasca vayaêibyasca haca mâyavaitibyasca astvatat haca anghaot, manahîm avi ahûm ithyejanguhatat haca anghaot aithyejanghuntem avi ahûm, katha te darekhem ushta abavat.
17
âat mraot ahurô mazdå, mâ dim peresô ýim peresahi ýim xrvañtem âithavantem urvishtrem pañtãm aiwitem ýat astasca baodhanghasca vî- urvishtîm.
18
h’arethanãm he beretanãm zaremayehe raokhnahe, tat asti ýûnô humananghô hvacanghô hushyaothnahe hudaênahe h’arethem pasca para-iristîm tat nâirikayâi frâyô-humatayâi frâyô-hûxtayâi frâyô-hvarshtayâi hush-sâstayâi ratuxshathrayâi ashaonyâi h’arethem pasca para-iristîm!

[[3]]

19
peresat zarathushtrô ahurem mazdãm, ahura mazda mainyûô spênishta dâtare gaêthanãm astvaitinãm ashâum, ýat drvå ava-mairyeite dva aêtãm xshapanem havô irva vanghaiti.
20
âat mraot ahurô mazdå, avadha bâ ashâum zarathushtra, asne kameredhât handvaraiti, kimãm gâthwyãm vacô srâvayô, kâm neme zãm ahura mazda kuthra neme ayeni, upa aêtãm xshapanem avavat ashâtôish urva ishaiti ýatha vîspem imat ýat juyô anghush.
21
ýãm bityãm dva aêtãm xshapanem havô urva vanghaiti.
22
âat mraot ahurô mazdå, avadha bâ ashâum zarathushtra, asne kameredhât handvaraiti, kimãm gâthwyãm vacô srâvayô, kâm neme zãm ahura mazda kuthra neme ayeni, upa aêtãm xshapanem avavat ashâtôish urva ishaiti ýatha vîspem imat ýat juyô anghush.
23
ýãm xrityãm kva aêtãm xshapanem havô urva vanghaiti.
24
âat mraot ahurô mazdå, avadha bâ ashâum zarathushtra, asne kameredhât handvaraiti, kimãm gâthwyãm vacô srâvayô, kâm neme zãm ahura mazda kuthra neme ayeni, upa aêtãm xshapanem avavat ashâtôish urva ishaiti ýatha vîspem imat ýat juyô anghush.
25
thrityå xshapô thraoshta ashâum zarathushtra vyusã sadhayeiti ýô narsh drvatô urva aêithâhuca paiti gaintîshca vîdidhâremnô sadhayeiti. âdim vâtô upa-vâvô sadhayeiti apâxtarat haca naêmât apâxtaraêibyô haca naêmaêibyô duzhgaiñtish duzhgaiñtitarô anyaêibyô vâtaêibyô. âat tem vâtem nånghaya uzgerembyô sadhayeiti ýô narsh drvatô urva, kudad aêm vatô vâiti ýim ýava vâtem nånghâbya duzhgaintitemem jigaurva.
—————
27
[anghå dim vâtayå fradvareñta sadhayeiti ýâ hva daêna, jahikayå kehrpa zôizdayå anaiwi-vastrayå frashnaosh apazadhanghô akaranem driwyå avavatô zôizdyå ýatha dâmãn zôizhdishtâish.
28
âat hîm davata peresô ýô narsh drvatô urva, cishca jahika ahi ýãm it ýava jahikanãm kehrpa zôizhdishtãm dâdaresa.
29
âat he paiti-davata ýâ hva daêna, azem bâ te ahmi ýum dushmanô duzhvacô dush-shyaothana duzhdaêna ýâ hva daêna h’aêpaithe tanvô, naêcishca thwãm cakana ava zôizhdâca axtica pavitica duzhgaiñtica everethrajãstaca apaiti-dvaêshayañtaca ýatha ýat me sadhayehi.
30
tum mãm cakañtha ýum dushmanô duzhvacô dush-shyaothana duzhdaêna ava zôizhdâca axtica pavitica duzhgaiñtica everethrajãstaca apaiti- dvaêshayañtaca ýatha ýat te sadhayemi.
31
ýat tum ainim avaênôish gâthåsca srâvayañtem apasca vanguhîsh ýazemnem âtaremca ahurahe mazdå naremca ashavanem kuxshnvãnem asnâatca jaseñtem dûrâatca, âat tum nishhidhôish saocayaca kerenvô baosavasca varaxedhråsca varô-zhinô urvarô-strayãsca kerenvô.
32
âat mãm afrithãm haitîm afrithôtarãm zôizhdãm haitîm zôizhdô-tarãm gerezdãm haitîm gerezdôtarãm apatairê gâtvô ånghanãm apatarô-tairê gâtvô heñdvâ-rayôish, aêta dushmata aêta duzhûxta aêta duzhvarshta, âat mãm dravañtô paskât ýazeñte angrem mainyûm darekhô-ýashtemca dush-hãm-parshtemca.
33
paoirîm gâma frabarat ýô narsh drvatô urva dushmate paiti nidadhât, bitîm gâma frabarat ýô narsh drvatô urva duzhûxte paiti nidadhât, thritîm gâma frabarat ýô narsh drvatô urva duzhvarshte paiti nidadhât.]
————— tûirîm gâma frabarat ýô narsh drvatô urva anakhraêshva temôhva paiti nidadhât.
34
âdim aoxta peresô pourvô drvô ava- meretô, katha drvô ava-mairyanguha katha drujô apa- jasô shitibyasca haca gaomavaitibyasca vayaêibyasca haca mâyavaitibyasca astvatat haca anghaot manahîm avi ahûm ithyejanguhatat haca anghaot aithyejanghuntem avi ahûm, katha te darekhem âvôya anghat.
35
adavata angrô mainyush, mâ dim peresô ýim peresahi ýim xrvañtem aithivañtem urvishtrem pañtãm aiwitem ýat astasca baodhanghasca vîurvishtîm.
36
h’arethanãm he beretanãm vishayâatca visha- gaitayâatca, tat asti ýûnô dushmananghô duzhvacanghô dush-shyaothnahe duzhdaênahe h’arethem pasca ava- mereitîm, tat jahikayâi frâyô-dushmatayâi frâyô-duzhûxtayâi frâyô- duzhvarshtayâi dush-hãm-sâstayâi aratuxshathrayâi drvaityâi h’arethem pasca ava-mereitîm!
—————
37
ahe narsh ashaonô fravashîm ýazamaide ýô asmô-h’anvå nãm, adhât anyaêshãm ashaonãm fraxshti ýazâi fravareta.
38
ushi ahurahe mazdå darethrâi mãthrahe speñtahe, xratûm ahurahe mazdå ýazamaide marethrâi mãthrahe speñtahe, hizvãm ahurahe mazdå ýazamaide fravâkâi mãthrahe speñtahe, aom gairîm ýazamaide ýim ushi-dãm ushi-daranem paiti asni paiti xshafane ýasô-beretâbyô zaothrâbyô.
—————
39
dâtare … kva ithra zî heñti iristanãm urvãnô ýå ashâunãm fravashayô.
40
paiti-shê aoxta ahurô mazdå, speñtat haca manyaot zarathushtra, aêshãm cithrem vahishtâatca mananghat.
41
âat ushanghãm para frêretôit aêshô merekhô ýô parôdarsh aêshô merekhô ýô varetô-dãsush, âthrô vâcem susrnaoiti.
42
âat maire fradûraiti bushyãsta darekhô-gava apâxtarat haca naêmât apâxtaraêibyô haca naêmaêibyô uiti aojemna uiti daomna, h’afasata mashyâkånghô h’afasata merezu-jvånghô h’afasata merezu-jîtayô.