Fargard 13.

1
kat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô mainyush paiti-jasaiti.
2
âat mraot ahurô mazdå spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite, aêtat tat dãma speñtô-mainyava aêtanghãm dâmanãm ýôi heñti speñtahe mainyêush dãma dâtem vîspem paiti ushånghem â hû vaxshat hazangraja angrô-mainyush paiti-jasaiti.
3
ýasca dim janat spitama zarathushtra spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite nava-naptyaêcit hê urvânem para-mereñcaite ýaêshãm anghat duzhâpîm cinvat-peretûm ýô nôit jvô sraoshyãm uzverezyeiti.
4
dâtare … ýô janat spânem sîzhdrem urvîsarem ýim vanghâparem ýim mashyâka avi duzhvacanghô duzhakem nãma aojaite kâ hê asti citha, âat mraot ahurô mazdå, hazangrem upâzananãm upâzôit aspahe ashtraya hazangrem sraoshô-caranaya.
5
kat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
6
âat mraot ahurô mazdå, daêum ýim zairimyangurem nãma spitama zarathushtra ýim mashyâka avi duzhvacanghô zairimyâkem nãma aojaite, aêtat tat dãma angrô-mainyava aêtanghãm dâmanãm ýôi heñti angrahe mainyêush dãma dâtem vîspem paiti ushånghem â hû vaxshat hazangraja speñtô-mainyûm paiti-jasaiti.
7
ýasca dim janat spitama zarathushtra daêum ýim zairimyangurem ýim mashyâka avi duzhvacanghô zairimyâkem nãma aojaite patitem hê manô anghat patitem vacô patitem shyaothnem uzvarshtem hê manô anghat uzvarshtem vacô uzvarshtem shyaothnem!
8
ýô aêtaêshãm sûnãm jaiñti ýim pasush-haurvãmca vishhaurvãmca vohunazgãmca draxtô-hunaranãmca xraosyô-taraca nô ahmât voyô-taraca hvô urva parâiti parô-asnâi anguhe
ýatha vehrkô vayôi tûite
dramne barezishte razûire.
9
nôit hê anyô urva haom urvânem paiti irista bãzaiti xraosyâca voyaca anguhe naêdha spâna peshu-pâna paiti irista bãzaiti xraosyâca voyaca anguhe.
10
ýô sûne pishtrem jaiñti ýim pasush-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå gaêthå tâyush vâ vehrkô vâ apaiti-busti haca gaêthâbyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
11
ýô sûne pishtrem jaiñti ýim vîsh-haurve us vâ hê gaoshem thweresaiti apa vâ hê paidhyãm kereñtaiti ýase-tat paiti avå vîsô tâyush vâ vehrkô vâ apaiti-busti haca vîzhibyô para-baraiti dasa adhât paiti afshê cikayat, cikayat sûnahe raêshô baodhô-varshtahe cithaya.
12
dâtare … ýô spânem jaiñti ýim pasush-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, ashta sata upâzananãm upâzôit aspahe ashtraya ashta sata sraoshô-caranaya.
13
dâtare … ýô spânem jaiñti ýim vish-haurum frazâbaodhanghem snathem vîkeret-ushtânem kâ hê asti citha, âat mraot ahurô mazdå, hapta sata upâzananãm upâzôit aspahe ashtraya hapta sata sraoshô-caranaya.
14
dâtare … ýô spânem jaiñti ýim vohunazgem frazâbaodhanghem snathem vîkeret-ushtânem kâ hê asti citha, âat mraot ahurô mazdå, xshvash sata….
15
dâtare … ýô spânem jaiñti ýim taurunem frazâbaodhanghem snathem vîkeret-ushtânem kâ hê asti citha, âat mraot ahurô mazdå, pañca sata….
16
hâu jazhâush hâu vîzâush hâu sukurenahe hâu urupish tizhi-dâtahe hâu raopish ýaonô-hvatahe hâu vîspanãm speñtô-mainyavanãm spacithranãm anya udra upâpa!
17
dâtare … dva asti spâ pasush-haurvô dâityô-gâtush, âat mraot ahurô mazdå, ýô ýûjyastîm haca gaêthâbyô parâiti sraêshemnô tâyûsh vehrkemca.
18
dâtare … kva asti spâ vish-haurvô dâityô-gâtush, âat mraot ahurô mazdå, ýô hâthrô-masanghem adhwanem haca vîzhibyô parâiti sraêshemnô tâyûsh vehrkemca.
19
dâtare … kva asti spâ vohunazgô dâityô-gâtush, âat mraot ahurô mazdå, ýô naêcim isaiti hunaranãm tanuye isaite thrâthrem!
20
dâtare … ýô spânem tarô-pithwem daste ýim pasush-haurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti fratemô-nmânahe nmânô-paitîm paiti tarô-pithwem daithyât atha âstryeiti.
21
dâtare … ýô spânem tarô-pithwem daste ýim vishhaurum cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti madhemô-nmânahe nmânô-paitîm paiti tarô-pithwem daithyât atha âstryeiti.
22
dâtare … ýô spânem tarô-pithwem daste ýim vohunazgem cvat aêtaêshãm shyaothnanãm âstâraiti, âat mraot ahurô mazdå, narem bôit idha ashavanem jaseñti ahmya nmâne mat avabyô daxshtâbyô ýatha âthrava paiti tarô-pithwem daithyât atha âstryeiti.
23
dâtare … ýô spânem tarô-pithwem daste ýim taurunem cvat aêtaêshãm shyaothnanãm âstâraiti, âat mraot ahurô mazdå, ýatha aêtahmi anghvô ýat astvaiñti aperenâyûkem dahmô-keretem shyaothnâvarezem verezyât shyaothnem paiti tarô-pithwem daithyât atha âstryeiti.
24
dâtare … ýô spânem tarô-pithwem daste ýim pasush-haurum kâ hê asti citha, âat mraot ahurô mazdå, aêtahe paiti peshô-tanuye duye saite upâzananãm upâzôit aspahe ashtraya duye saite sraoshô-caranaya.
25
dâtare … ýô spânem tarô-pithwem daste ýim vishhaurum kâ hê asti citha, âat mraot ahurô mazdå, navaitîm upâzananãm upâzôit aspahe ashtraya navaitîm sraoshô-caranaya.
26
dâtare … ýô spânem tarô-pithwem daste ýim vohunazgem kâ hê asti citha, âat mraot ahurô mazdå, haptâitîm upâzananãm….
27
dâtare … ýô spânem tarô-pithwem daste ýim taurunem kâ hê asti citha, âat mraot ahurô mazdå, pañcâsatem upâzananãm….
28
aêtem zî aêtahmi anghvô ýat astvaiñti spitama zarathushtra speñtahe mainyêush dâmanãm âsishtem zaurvânem upâiti ýat spânô ýôi hishteñte ahvarô upa hvareñtem parô spasânô eviñdânô parô xshvisca âzûitishca gêush mat baratu hvarethanãm sûnahe aêvahe dâityô-pithwem.
29
dâtare … ýat ahmi nmâne ýat mâzdayasnôish spâ avacå vâ bavat adhâityô-xratush kutha tê verezyãn aête ýôi mazdayasna.
30
âat mraot ahurô mazdå, ava hê barayen tâshtem dâuru upa-tãm manaothrîm stamanem hê adhât nyâzayen ishti-masô xraozhdvahe bish aêtavatô varedvahe.
31
aêtahmâtcit nidarezayen frâ-hîmcit nidarezayen ýezi nôit spâ avacå vâ adhâityô-xratush pasûm vâ narem vâ raêshyât para hê irishiñtô raêshem cikayat baodhô-varshtahe cithaya.
32
paoirîm pasûm avakhnât paoirîm narem raêshyât dashinem hê gaoshem upa-thweresayen bitîm pasûm avakhnât bitîm narem raêshyât hôyum hê gaoshem upa-thweresayen.
33
thritîm pasûm avakhnât thritîm narem raêshyât dashinem hê paidhyãm upa-kereñtayen tûirîm pasûm avakhnât tûirîm narem raêshyât haoyãm hê paidhyãm upa-kereñtayen.
34
puxdhem pasûm avakhnât puxdhem narem raêshyât dumemcit hê upa-thweresayen, aêtahmâtcit nidarezayen … cithaya.
35
dâtare … ýat ahmi nmâne ýat mâzdayasnôish spâ ahãm-baodhemnô vâ bavat adhâityô-xratush kutha tê verezyãn aête ýôi mazdayasna, âat mraot ahurô mazdå, avatha hê baêshazem upôisayen ýatha dahmâicit ashaone.
36
dâtare … ýezi isemnô nôit viñdâite kutha tê verezyãn aête ýôi mazdayasna.
37
âat mraot ahurô mazdå, ava hê barayen … frâ-hîmcit nidarezayen ýezi nôit spâ ahãm-baodhemnô maêkhe vâ câiti vâ vaêmi vâ urûidhi vâ apô vâ nâvayå paidhyâite ahmat haca irishyât,
38
ýezi tat paiti irishyeiti ainghat haca shyaothnâvareza atha bavaiñti peshô-tanvô!
39
spânem dathem zarathushtra
azem ýô ahurô mazdå
hvâvastrem hvâ-aothrem
zaêni-budhrem tizhi-dãsurem vîrô-draonanghem gaêthanãm harethrâi, adha azem ýô ahurô mazdå spânem nidathem ýat dim mazaosh kehrpô tûrahe ýezi asta asha xrathwa ýezi asta gaêthâbyô.
40
ýasca hê spitama zarathushtra vâcim paiti zaênish anghat nôit hê tå vîspô tâyush vâ vehrkô vâ apaiti-busti haca vîzhibyô para-baraiti, jãthwa vehrka scãthwa vehrka pôithwa vehrka snaêzhana!
41
dâtare … katârô zî ayå vehrkayå jãthwô-tarô anghen ashâum ahura mazda ýatha spâ vehrkahe kerenaoiti ýatha ýat vehrkô spâ, âat mraot ahurô mazdå, aêshô zî aêtayå vehrkayå jãthwô-tarô anghen ashâum zarathushtra ýatha spâ vehrkahe kerenaoiti ýatha ýat vehrkô spâ.
42
ustâcit spâna pateñti pasush-haurvãmca vish-haurvãmca vohunazgãmca draxtô-hunaranãmca ýatha-khnyô gaêthâbyô taêcit ýå bavaiñti aoshô-tarasca duzhitô-tarasca gaêthô- jatarasca ýatha anya spâ.
43
ustâcit vehrka pateñti khnyô gaêthâbyô taêcit ýå bavaiñti aoshô-tarasca duzhitô-tarasca gaêthô-jatarasca ýatha anya vehrka!
44
sûnahe aêvahe ashtâ bifrem, asti shê haêm ýatha athaurune asti-shê haêm ýatha rathaêshtârahe asti-shê haêm ýatha vâstryehe fshuyañtô asti-shê haêm ýatha vaêsâush asti shê haêm ýatha tâyaosh asti-shê haêm ýatha disaosh asti-shê haêm ýatha jahikayå asti-shê haêm ýatha aperenâyûkahe.
45
paiti hvaretha hvaraiti ýatha âthrava huxshnaothrô ýatha âthrava hvâzârô ýatha âthrava aêshô kasu draonô ýatha âthrava aiti-shê haêm ýatha athaurune, raptô paurvaêibya ýatha rathaêshtå aipi- jatô gãm hudhånghem ýatha rathaêshtå parô pasca nmânahe ýatha rathaêshtå aiti shê haêm ýatha rathaêshtârahe.
46
zaênangha evîspô-hvafna ýatha vâstryô fshuyãs parô pasca nmânahe ýatha vâstryô fshuyãs pasca parô nmânahe ýatha vâstryô fshuyãs aiti-shê haêm ýatha vâstryehe fshuyañtô, hvañdrakarô ýatha vaêsô asnaêraêshô ýatha vaêsô zairimyafsma thryafsma ýatha vaêsô aiti shê haêm ýatha vaêsâush.
47
tãthrô-cinô ýatha tâyush xshapâyaonô ýatha tâyush apishma-hvarô ýatha tâyush athaca duzhnidhâtô ýatha tâyush aiti- shê haêm ýatha tâyaosh, tãthrô-cinô ýatha disush xshapâyaonô ýatha disush apishma-hvarô ýatha disush athaca duzhnidhâtô ýatha disush aiti-shê haêm ýatha disâush.
48
hvañdrakarô ýatha jahika asnaêraêshô ýatha jahika airitô pañtânem ýatha jahika zairimyafsma thryafsma ýatha jahika aiti-shê haêm ýatha jahikayå, hvafnô ýatha aperenâyush snaêzhanô ýatha aperenâyush hizu-drâjô ýatha aperenâyush pairi-taxtô paurvaêibya ýatha aperenâyush aiti-shê haêm ýatha aperenâyûkahe.
49
ýat mê aêshãmcit nmânanãmca caratô dva mâ apa-raodhayaêta ýasca spâ pasush-haurvô ýasca spâ vish- haurvô, nôit mê nmânem vîdhâtô hishteñti zãm paiti ahuradhâtãm ýezi mê nôit ånghât spâ pasush-haurvô vâ vishhaurvô vâ!
50
dâtare … ýat sûnîsh para-irithyeiti nishtâ-zemanasca pairishtâ-xshudrasca kutha aêshãm baodhô jasaiti.
51
âat mraot ahurô mazdå, xå paiti apãm parâiti spitama zarathushtra athra ånghãm hãm-bavaiñti dva udra upâpa hazangrâish sûnîsh strî- nâmanô hazangrâish sûnîsh nairyô-nâmanô mithwana strica nairyasca, udrahe avakhnânô haêcô kerenaoiti ýat avâstrem.
52
para nû ahmât haca asanghatca shôithrâatca axshtat spitama zarathushtra izhâca âzûitishca para dasvareca baêshazemca para fradathemca varedathemca vaxshathemca para ýavanãmca vâstranãmca uruthem.
53
dâtare … kadha-nô ahmâi asanghaêca shôithraêca paiti-jasâtô izhâca âzûitishca kadha dasvareca baêshazemca kadha fradathemca varedathemca vaxshathemca kadha ýavanãmca vâstranãmca uruthem.
54
âat mraot ahurô mazdå, nôit nû para ahmât spitama zarathushtra asanghaêca shôithrâica paiti-jasâtô izhâca âzûitishca nôit dasvareca baêshazemca nôit fradathemca varedathemca vaxshathemca nôit ýavanãmca vâstranãmca uruthem.
55
para ahmât ýat idha udra-janô hathra jatô nijanâite ýat vâ aêtahe udrahe upa dahmem urvânem frâyazåñte thri-ayarem thri-xshaparem saociñtat paiti âthrat frasteretât paiti baresmen uzdâtât paiti haomât.
56
pascaêta ahmâi asanghaêca shôithraêca paiti-jasâtô izhâca âzûitishca pascaêta dasvareca baêshazemca pascaêta fradathemca varedathemca vaxshathemca pascaêta ýavanãmca vâstranãmca uruthem! ashem vohû…!!